倪晨曦從模到影 善用天姿

來自多倫多的前華裔小姐倪晨曦，簽約寰宇公司後以香港為基地，先發展模特兒事業，再攻影壇。五呎八吋高、天生美人胚子的她得天獨厚，但能否充分利用這副「偈」，還得看小妮子的造化！

倪晨曦（Elva）05年參選多倫多華裔小姐，以大熱姿態奪冠而回，其後競選華姐亦躋身五強，最終雖然敗北，但獲寰宇公司簽約為旗下藝人。先天條件優厚的她五官標致、擁有五呎八吋的高挑均勻身材，旋即成為廣告商的新寵兒。Elva打算先在港打穩模特兒根基，再進軍影壇發展，近日小試牛刀拍攝電影短片的她認為，拍戲比模特兒工作辛苦很多：「拍戲同做模特兒都係中間有好多時間要等，但係做模特兒只需要短時間嘅專注力，等緊嘅時間可以食嘢、瞓覺，拍戲就辛苦好多！個人唔可以太放鬆，不過成就感大好多，拍完唔會好攰，反而會好開心，好想睇番拍咗嘅嘢，就係呢一點吸引到我繼續拍戲！」

離鄉飽受情傷

早前Elva遠赴武漢拍攝內地電視劇《身邊的幸福》，在劇中飾演一名善解人意、經常開解男友的女生，現實生活中有一個孖生細妹的她，亦常負起照顧別人的責任：「我個妹只係遲過我一分鐘出世，但係佢好靜，性格同我完全相反！之前佢都有去選多倫多華裔小姐，不過就冇攞獎。」常言道雙生兒會有心靈感應，雖然Elva沒有特別為意，不過亦曾發生類似事件：「有次我整親隻手，佢就差唔多時間整親隻腳！最近佢託人買嘢攞返香港畀我，點知佢買咗嘅嘢同我想買嘅一模一樣！」

雖然習慣擔當照顧別人的角色，但在愛情路上，她還是跟很多女生一樣，渴望被保護，想小鳥依人地靠在男友的臂彎：「希望對方會好細心，有啲嘢唔使我講都知我諗乜！」之前Elva決心來港發展，當時身在加拿大的男朋友因抵受不住遠距離戀愛而分手，令她對遠距離戀愛產生恐懼：「唔能夠日日見係會辛苦啲，同埋會有溝通問題。因為唔可以面對面見到對方，只可以用電話，如果鬧交都未必咁快修補到！」

看透娛圈真諦

早前因網上流傳一張Elva跟黃宗澤（Bosco）的合照令兩人鬧緋聞，讓她感到很可怕，而且廣東話未見流利亦成為她目前最大的屏障：「有時記者問我嘢，我都唔知講乜。廣東話唔係我第一語言，要諗吓先講到。」但她沒有因為一次緋聞而怕了娛樂圈：「好多嘢都係睇自己，只要問心無愧，點都唔會驚！」而這件事亦令她洞悉內地跟香港娛圈的不同之處：「內地出名嘅演員大部分靠作品令觀眾認識，好似周迅、李冰冰同范冰冰咁，專業性高啲，反而香港就着重個星有冇名氣，只要有名氣，就算冇拍過戲都可以做女主角，但係內地出身嘅演員九成都有戲劇底子！」

後記：蘇州美女多

在南京出生的Elva祖籍蘇州，蘇杭出名靚女多，她亦秉承了父母的優良傳統，她說：「我媽咪好靚女，爸爸就骨架細！我對眼似媽咪，其他地方就似爸爸。其實我唔識講蘇州話，不過知道蘇州嗰邊啲女仔皮膚好好，可能因為啲水質好啲！」