郭羨妮500萬買「私己樓」

郭羨妮（Sonija）明年下嫁內地武指朱少杰，據知她早前趁樓市稍為回落，以筍價逾500萬元將現居的清水灣半島海景單位轉租為買，但她否認是貼錢築愛巢，還透露「準老公」正努力賺錢在內地置業，坦言心中富有，亦不介意對方被指是窮武指。

郭羨妮去年7月拍內地劇《宮鎖心玉》時，與內地武指朱少杰邂逅，一撻即着，拍拖數月更火速定下婚盟。由於朱少杰與Sonija名氣懸殊，收入亦與未婚妻差天共地，故不時被寫成「窮武指」，但愛情至上的Sonija一於少理，最近更秘密在港購入清水灣半島海景單位。

遇筍價轉租為買

據知，Sonija一直有留意樓市走勢，有見香港樓市近期稍為回落，立即出手買樓積極創富。翻查資料，Sonija曾於08年置業，並在金融海嘯前醒目離場，轉手賺40萬元，繼而與母親租住清水灣半島近千呎海景單位。由於業主劈價割愛，她認為是入市良機，故將現居單位轉租為買，斥資逾500萬元筍價購入上述單位，為將來打算。

Sonija昨日接受電話訪問時承認再入市做業主，但不肯透露樓價，她說：「唔係太貴，所以買得起！」問到是否與朱少杰聯名？她否認：「唔關佢事，係媽咪唔想搬嚟搬去，我亦好想畀一個安樂窩媽咪。（擔唔擔心畀人話貼錢築愛巢？）唔驚，佢都唔會嚟香港住，會一直留喺內地發展。」

要乜有乜絕不窮

談到未婚夫，Sonija還指愛巢將選址上海或北京，她說：「都有計劃係呢兩個地方買樓，佢儲緊錢啦！（層樓寫邊個名？）梗係寫我，哈哈。」她忠於自己的愛情，亦懶理未婚夫經常被指是窮武指，她笑笑便說：「我唔介意人哋咁講，佢亦都唔會介意，只要心中唔貧窮就得，總之我需要乜嘢、想食乜佢都畀到我，咁都算窮？」據知，朱少杰其實身兼多職，除了武指，更是導演及製作人身份，最近亦於內地開拍新劇。