超盈碌出氫氣球傷肩嚇呆

賭王何鴻燊與四太梁安琪的千金何超盈，昨日自爆早前歐遊時死裏逃生的經歷！原來她於土耳其坐氫氣球時發生意外，降落時因風大吹翻氫氣球，以致弄傷香肩，事後更被賭王勒令不准再坐！

何家淑女超盈昨日出席珠寶活動時表示，剛與母親、弟弟妹妹及男友Greg赴土耳其及希臘等旅遊充電，不過途中卻發生意外，令她經歷死裏逃生的一刻！她猶有餘悸說：「有一日坐氫氣球，降落嗰陣因為好大風，令氫氣球吹翻咗，我哋個個瞓晒喺地，真係好驚，好危險，以後唔敢再坐！（有冇喊？）咁又冇，不過撞親膊頭！（Greg有冇心痛？）嗰陣佢都喺度！（呵番你？）大家都嚇親！（佢做護花使者？）都有！」

超盈表示將意外告知賭王後，被力勸「以後咪坐」：「爹哋話『都叫咗你唔好坐，好危險，以後都唔好坐喇！』（爹哋最近身體點樣？）好好！」對於超雲早前亦歐遊，超盈說：「歐洲好大，冇見到佢，我係同屋企人去嘅！」她透露現正等待開學，不過稍後可能會到美國旅行。

火速簽纖體療程

另一方面，超盈與Greg愛得癡纏，有愛情滋潤的她亦變得心廣體胖。日前她身穿背心短打遊銅鑼灣，被美容院職員落力推銷，游說她參加纖體療程。起初她只是點頭，後來卻愈聽愈有興趣，又向推銷員查問，不消15分鐘，她已扑錘簽下療程，認真豪爽！超盈發現記者後，即友善地打招呼，問到購買纖體療程？她大方直認：「係呀！我見佢好慘，幫佢簽張單囉！（少見你露面？）呢排肥咗，唔想見人，多數留喺屋企。（有冇搵超雲？）有呀！最近佢唔喺香港，我依家約咗超蓮飲茶。」之後到附近餐廳會合超蓮。