劉美君飽歷練

好勝愛戰高難度

育有三子女的潮媽歌手劉美君（Prudence），不經不覺入行25年，推出首張專輯時（1986年），「小巨肺」林欣彤（Mag）仍未出世，絕對是橫跨兩代的女歌手。Prudence曾居於外地一段時間，近年才重返樂壇出碟、拍電影和開騷，前年還擔任《超級巨聲》主持。當年她的首張個人專輯銷量理想，而且以前衞大膽見稱，極具話題性。相比起為事業剛起步而感壓力的Mag，Prudence現時工作心態較隨心，宗旨是：「貴精不貴多，重質不重量。」談到樂壇新人輩出，Prudence寄語他們要創新及敢挑戰，盡可能別一心二用：「我只可以One Task，唔可以Multi-task。」

早前Prudence推出國語碟《Love Addict》翻唱經典男人歌，她也承認有難度：「因為先入為主，所以我以感情同感覺行先，唔可以將原曲改到古靈精怪，唔會為變而變，反而難在編曲。」她又說：「每次出碟都想做特別嘢，冇靈感嘅就唔做。」由於出於好勝心，Prudence愛向高難度挑戰：「碟中有首歌《其實你不懂我的心》，我唔係好鍾意歌詞，唱嗰時唔知可唔可以Carry到，但因為好勝，就成功挑戰呢首歌。（翻唱女人歌？）呢個階段唔知，靈感到嘅話就開始。」

年近半百弗如廿歲

Prudence雖然已年屆46之齡，兼育有三子女，但愈來愈後生，身形比以前更弗，原來全拜瑜伽所賜：「依家鍾意過有規律性嘅生活，夜晚冇嘢做十點幾就瞓覺，第二朝六點幾起身，身形同心態更勝過往幾年。（回春？）早排驗身，身體機能同精神狀況似20幾歲，我都覺得自豪。（節食？）冇喎，我係繼阿倫（譚詠麟）之後嘅『小焚化爐』。」

每個人也會經歷得失，Prudence也不例外，曾經歷兩次婚姻失敗，但並未將她擊倒，她現時有要好男友，不諱言現時心境才是最重要，暫無意再婚，反而日前在微博報喜，26歲大仔將與女友訂婚，可喜可賀。

後記：穩定「君」心

劉美君現時迷上玩瑜伽，因為瑜伽令她悟出很多事情，更清楚自己想要甚麼：「有時睇番啲舊相，真係覺得自己嗰時好殘、好攰，依家反而愈來愈精神，其實人生仲有好多嘢都未做，所以一定要好好保持身體健康。」