林欣彤初上路

林欣彤與劉美君，一個初生之犢，一個老娘有火，二人同受《巨聲》命運播弄，前者如何抗跌踏上天后路？後者又為何能浴火重生？

萬千寵愛贏名利

用「一夜成名」形容年僅20歲的林欣彤（Mag），最適合不過。去年Mag參加《超級巨聲2》踏上冠軍成名路。雖然處女主打歌剛派台，連個人專輯都未有，但已經備受追捧，Mag早前還以強勢姿態加入英皇大家庭，成為容祖兒、Twins和古巨基的師妹。

Mag與潮媽歌手劉美君（Prudence）有點相似，同屬實力派，亦是於年紀輕輕時闖出名堂；Prudence最近推出翻唱專輯而大獲好評，Mag亦因為翻唱別人的歌而奪冠，兩人似結下不解緣！

一夜成名令Mag名利雙收，接連拍電影、拍廣告及錄碟，工作不斷，更贏得「小巨肺」稱號。只是短短一年，已由學生妹變為萬千寵愛的樂壇新星，她說：「唔止幸運，係超級幸運！冇諗過得到咁多。（應付唔嚟？）驚自己做得唔夠好，依家最想集中做好唱片，當然亦唔會抗拒拍戲。」畢業後的她，大個女要肩負養家重責：「呢行收入始終唔係咁穩定，驚屋企人唔夠食好住好﹗（豬籠入水？）確係多咗好多，仲養到家。」

問到現時是否已習慣面對傳媒，Mag說：「習慣晒，但有另一種壓力，依家有自己嘅歌，外界自然對你有期望，連自己都有寄望，壓力相對嚟講大好多，錄音時有種摸黑感覺。」

保持對音樂「有火」

處女主打歌《洗澡》日前派台，Mag直言心情緊張壓力大：「錄音嗰陣不停叫自己唔好諗咁多嘢。（萬千寵愛？）都係嘅，但畀自己好大壓力。」外界對其新歌反應不一，她說：「明白每首歌梗有人鍾意同唔鍾意，我着緊演繹，只係有人彈到歌詞一文不值，好戥作詞人唔抵。」問到是否逐步邁向天后級？她謙稱：「有排呀！依家要做好本分。」簽約新公司後，Mag表示期待與師兄師姐合作，又笑言預料到會有爭寵是非：「唔會理呢啲，最緊要唔好牽涉到圈外朋友同家人。」

Mag自知仍有不足之處：「咬字同埋鼻音，錄音時監製有提點，點樣改善同控制情緒。」對於新一屆《超級巨聲》舉行在即，她說：「睇過試音，佢哋好『有火』。（你依家有冇？）有嘅！（再翻唱人哋嘅歌？）想試吓。」

提到與「巨聲幫」羅孝勇和胡鴻鈞爆緋聞，Mag說：「唔知發生乜事，但唔會尷尬，有時當笑話聽，我最在意係影得醜唔醜樣。」她不介意將來公開拍拖，認為感情事可變成工作動力。

後記：親民「彤」星

成名後的Mag，雖然已是炙手可熱的樂壇新星，外出難免被評頭品足，但她一於少理，閒時仍會幫襯大牌檔或平民化茶餐廳，她說：「雖然依家出街係會少咗空間感，但我都照去大牌檔，最多戴定口罩。」