泳漢怒斥思琦促還清白

楊思琦與李泳豪九年情玩完，李家「聯口」炮轟思琦，直斥她前言不對後語，更不忿她數臭李家上下，泳漢接受本報獨家專訪時怒轟思琦：「我要佢還我哋李家一個清白！」而泳豪則勸思琦勿再傷害其家人。

楊思琦日前突然宣布與李泳豪結束九年情，李家上下隨即槍口對外炮轟她無情無義，但她其後在節目上聲淚俱下否認另結新歡及懷孕，加上前日開腔自爆遭李泳漢及施明冷待，令分手原因更添疑竇。李泳漢昨日偕母親施明接受本報獨家專訪，力斥思琦是大話精，並強調站出來純為道出事件真相，又指思琦為保形象，每次說的版本均有出入，他說：「今年一、二月，思琦仲好甜蜜咁翹住豪仔話要結婚，仲同我講要一百圍酒席！我要佢還我哋李家一個清白！」並直言思琦四月搬走時，泳豪及施明根本不在場，又有大批物件留在家中，故不似分手，並踢爆她於生日會後曾與泳豪同房。

鬧細佬「點養得起我」

泳漢直言思琦「精甩辮」，因深知狂插泳豪對自己百害而無一利才轉為攻擊李家，並否認當對方透明：「佢當我哋透明至啱！呢九年嚟，o黎媽咪當佢女咁錫，但有晚凌晨兩點幾，思琦喺廚房食火龍果，媽咪咁啱想入廚房，點知佢竟然叫我阿媽『食屎』！」

他又指摘思琦當泳豪「阿四」，但她卻絕少「服侍」男友：「有次佢急Call細佬落樓幫佢拎嘢，點知泳豪急得滯跣咗落樓梯，成個背脊瘀晒，之後佢竟然話『Claim保險囉』！」又直斥她脾氣臭：「有一次我哋喺屋企食安格斯牛扒，佢突然好大力放低刀叉，嘈我細佬話冇麵包同菜，仲問細佬點養得起佢！第二日再同工人講，話我阿媽有心害佢，生暗瘡仲煮牛扒佢食，你話佢幾過分！」對於思琦呻被迫交大筆搬運費，他頓感莫名其妙：「筆錢全部係我阿媽出！」並指思琦出錢修補天台之說大話連篇，因事情始於三年前，目前還在打官司，故她沒可能已「找數」。

儲到筆錢結婚

此外，被指與媽咪及泳漢關係欠佳的泳豪，昨日專誠做「柴可夫」接送母兄，以行動證明家庭和睦。對於思琦對家人的指控，面容憔悴的他不欲多談，並嘆氣說：「既然佢承認有第三者，佢對我嘅傷害已經好深，希望佢唔好再傷害我家人！」對於遭泳漢打斷手、碌爆卡養家及拖婚期等問題，他一概否認：「佢講嘅嘢全部都唔係事實，我因為打拳整親手，唔關阿哥事。而且我一直有理財概念，加上一路有儲錢結婚，依家仲儲到筆錢添。」他又表示拍拖期間屢次談婚論嫁，更多次求婚，奈何思琦每每以影響事業為由推卻。