拉姑壓力爆煲狂啪安眠藥

自發生「鋒芝婚變」後，霆鋒母親狄波拉一直面對外界種種負面指摘，但為顧全大局，近兩個月來鮮有發言澄清。直至昨日，她接受本報獨家專訪時自爆身體已不勝負荷，靠狂食安眠藥才能入睡。

謝霆鋒與張栢芝感情生變，除苦了一對年幼囝囝外，身為母親的狄波拉同樣承受無比壓力，六十多天來飽受外界無情批評，為了不想事情變得更複雜，她選擇「忍氣吞聲」，直至昨日離港前，她接受本報獨家專訪，坦承身體出現問題，近月單靠狂食安眠藥才能入睡！

就如拉姑所言，霆鋒由馬來西亞返港，令她如釋重負，故選擇昨天與丈夫返回新加坡休息，並順道接受詳細的身體健康檢查。談到六十多天來的風風雨雨，拉姑心情已見平復，或許就如她所言：淚已流乾了。

拉：狄波拉　　記：記者

記：囝囝（霆鋒）決定離婚喎？

拉：啲細路大喇！呢啲事交由佢哋自己處理。霆鋒16歲就出道，佢身邊成日一大班人、助手，未結婚前又搬咗出去住，佢慣咗冇人管，總之有大鑊嘢發生，佢會喺我身邊，我會喺佢身邊，呢個係佢嘅生活模式！我十幾年冇去佢屋企，因為咁新抱同外邊人以為我哋關係有問題！

重申與新抱 從無拗撬

記：點解選擇今日（9日）離開？

拉：霆鋒返嚟，我安樂晒，可以安心走喇！因為我真係需要休息，身體愈嚟愈差，所以我先生叫我去做身體檢查。我尋日唔走，我同霆鋒講因為唔想喺機場撞到你、撞到你太太，如果我出現，會令你哋更加麻煩，又會話我喺背後搞事……我話你知，我連霆鋒請咗律師（搞離婚）都唔知！我冇見過個仔，亦唔會參與搵律師同係咪離婚……我啲眼淚流乾咗！

記：係咪瞓唔着？

拉：瞓唔着已經係最小事，日日坐車出去都轉三次車避記者，匿車尾後面仲要伏低！以前一粒安眠藥可以瞓一晚，依家三小時一粒就擘大眼！（加重藥力？）依家三個鐘一粒囉！

記：幾耐冇見栢芝？

拉：嘩！耐囉！大家都知佢呢半年特別忙啦，好多嘢都係出面街外人話我知：「你個孫又去咗北京！」Lucas幾個月嗰陣，啲人話佢好得意，問我攞啲孫嘅相，我話問佢媽咪攞，嗰個唔係我財產，所以我唔會去佢哋屋企o架！我覺得係新抱嘅天地，每個女主人都有唔同嘅方法，我從來冇同佢拗撬過，只有佢話：「唔好意思奶奶，打親畀你都係有事。」我就會答：「唔緊要，你講啦新抱仔，你講得到我就一定做到。」

記：好耐冇見過啲孫？

拉：四月到依家未見過！之前想同粒孫（Quintus）慶祝生日都要申請，當時佢哋兩個（鋒芝）關係已經好差，個仔同我講不如遲啲先啦！唉！或者到時我唔知死咗未？

記：Lucas八月返學喎？

拉：你講我咪知囉！不過，佢哋有需要就透過司機同工人話畀我知佢哋需要乜嘢，我會話：「好呀、好呀！」我唔會覺得你哋有嘢就鍾無艷，我會諗幾好喎！我都有啲用。

外界關心 感動又安慰

記：點解唔跟仔仔去陽明山莊見孫？

拉：我覺得唔好好似配合你哋寫嘅畫面，話我同霆鋒去搶仔，唔好用個搶字，又話我係幕後黑手，黑乜嘢手？我覺得我嗰隻同情心嘅手，邊個埋嚟都覺得溫暖，我連佢搬屋都唔知！四月嗰陣啲孫嚟我屋企，夜喇咪叫佢哋走，點知菲傭話依家住得好近，5分鐘車程，咁我先知！

記：對鋒芝婚變仲有期望？

拉：我以為霆鋒唔出聲仲有得掹，原來已經有律師喺度搞緊！我同佢四十幾日冇通過電話。月前，霆鋒突然嚟咗我屋企，原來佢同栢芝鬧大交，跟住栢芝揸咗架車出去，就撞到個老伯！當時我勸霆鋒返屋企，佢話好難頂，我話：「如果你再嚟搵我，我都係叫你返屋企咋！」我梗係覺得萬事有商量啦！當年我同四哥（謝賢）都處理得好好！

記：好多人都戥佢哋兩個可惜，當日發生床照事件，佢哋都能夠攜手捱過，大家都以為佢哋可以一生一世，但依家好多人跌晒眼鏡！

拉：係囉！你真係諗唔到，比起之前嘅風風雨雨，今次又算得係乜！

記：你曾經講過「有父就有母」？

拉：梗係啦！我想兩個孫喺健康、快樂嘅生活環境下長大，但呢啲係緣分同天意嘅安排，如果個天要Stop你，咁邊個都幫唔到手。雖然近日外界咁多傳聞，又話我係幕後黑手，又話我打新抱，但早排我去食麵，路過唔識嘅食客就嚟拍吓我膊頭，叫我撐住！我真係覺得好感動、好安慰！