鄭文雅出攝影集30日速成

攝影高手鄭文雅（Olivia）將於本月書展推出首部攝影集，以中國戲曲為題材，向中外推廣戲曲文化。一手包辦相片及文字的她僅花近一個月時間便完成影集，認真厲害！

文：專案組　攝：李柏儒

自淡出幕前後，鄭文雅（Olivia）發展多項藝術專長，影靚相正是其中之一，並將於本月的書展推出首本攝影集《文情雅戲》，相片來自五月在京滬公演的中國戲曲《蝶海情僧》台前幕後的片段，她說：「開頭諗住影嚟做個Record，但朋友睇過話啲相好靚叫我出書！《蝶》係一齣有齊京、越同粵劇元素，係好好嘅題材去分辨唔同戲曲。」

Olivia亦親撰攝影集中介紹戲曲的文字，為此更特意到圖書館作資料搜集，相集僅用一個月便火速誕生，進度神速！她表示享受拍攝過程，最難之處是舞台的燈光變化：「有時好強，有時好暗，冇Idea下一場會係點。」又指最愛在後台拍攝演員上妝，當中以蓋鳴暉上妝未換衣的綵排照為至愛：「好少見佢咁排戲！當時問過佢哋幾時可以影，因為要尊重番佢哋，作為一個藝人，我好明白。」

轉贈慧妍雅集籌款

Olivia今次出書的使命是將中國戲曲向外推廣，故影集亦會在海外發行：「我會攞一千本書當做自己報酬，部分送畀中、大學圖書館，另一部分會畀慧妍雅集作籌款，撥入推廣本地戲曲發展基金。」她又透露計劃開影展及出書教打Golf，問到會否復出幕前，她直言分身不暇：「我興趣太多，周身唔得閒！」