惠英紅牛角撞肋骨嗌救命

惠英紅（小紅）為陳可辛「重操故業」，不但瞓身牛屎堆中搞到周身臭，更在膝蓋上再添疤痕，難怪「史上最強」的甄子丹識英雄重英雄，大讚小紅寶刀未老！

文：影視組

拍打戲出身的小紅在電影《武俠》內的戲份不多，但當事人卻拍得相當辛苦，態度專業，其中一場與甄子丹對打及飛簷走壁的戲份更成為推介焦點。由於子丹助手事前到瀑布下視察環境，一度失蹤險喪命，令劇組人員相當擔心！小紅回想起來大嘆命大：「佢哋想我死得悲壯啲，所以除咗同子丹追逐之外，之前嗰場戲仲講我喺牛棚畀啲牛撞同踩死，拍嗰時啲牛失控，牛角撞到我啲肋骨，痛到我叫救命，事後仲畀朋友鬧，話我乜都夠膽死！」

成身牛屎味返香港

「與牛搏鬥」後，小紅未有時間梳洗清理，便不顧滿身牛屎味衝往機場，趕返港拍另一組戲，情況讓她相當尷尬，她笑言相當可憐：「成身好唔舒服又覺得隔籬啲人投以奇異眼光，印象難忘。」

此外，拍攝現場海拔高達二千八百多呎，小紅甫抵埗還未來得及適應環境，便要與子丹「埋身肉搏」，事後感覺天旋地轉，不過她的身手卻叫在旁的子丹大為欣賞，大讚她寶老未刀，還打趣指對方大可「再打多幾十年」，氣得小紅不禁翻白眼！今次拍打戲過足戲癮，然而小紅卻因此再添新疤：「有場戲傷到膝蓋一帶，傷口見骨，我只係喺現場做咗簡單嘅治療，由於處理失當，一度發炎流膿，所以最終傷口留疤，最嚴重時化妝都遮唔到，依家返嚟做咗四次彩光，都發現唔能夠磨平。」她笑言現時每次碰上陳可辛，都會找對方「晦氣」，提醒他自己身上的傷疤，不過當問到有否要求加片酬時，小紅抵死地說：「醫藥費都冇畀呀！哈哈！」

化妝：Louie suk bing Angel

髮型：Mok Shuk Yee

場地：Harlan's Bar and Restaurant