女歌手羽翹（Ava）今年五月完成首個個人音樂會，她坦言未有預料過會有那麼多支持者，今次成功總算是對入行兩年的自己一個好交代：「未做過有咁多嘢要準備嘅騷，其實有好多甩漏，有時行上台嗰刻都唔係幾稱心，但最終都完成到，覺得唔期待自己演出Perfect嘅心態，出嚟效果就係最Perfect，唔好畀太大壓力自己。」
微博粉絲激增
忙完音樂會，Ava繼續趕星途出碟出書，更打算殺入內地市場，早前獲中央台邀請擔任綜藝節目嘉賓，到北京「試水溫」，她說：「好開心！製作單位好好人，畀好多機會我，表演由一首歌變三首歌，簡直有為港爭光嘅感覺，仲話會再搵我！今次有表演彈琴，希望下次可以跳舞畀內地觀眾睇。」節目亮相後，她的微博粉絲激增二千人，難怪令進軍內地的信心大增：「嚟緊會去內地走一轉，北京、上海同廣州等。」
現年25歲的Ava經常工作「纏身」，鮮有緋聞對象。她表示現以工作為重，加上未有心儀對象，笑言「疊埋心水」十年後先做人老婆：「之前上蘇民峰嘅節目，佢話我如果2012、13年唔嫁，就要等到35歲先有得嫁，好悲哀囉！師傅話一個好慢、好遲鈍嘅男人會係我嘅好老公，我就鍾意好瘦嘅男仔，性格點冇乜所謂，對我好就OK。」並透露圈中稔熟的男歌手大部分跟她稱兄道弟，沒有發展空間。
不過，她最近與憂鬱小生羅力威（Adason）經常出雙入對出席活動，又為對方的音樂會擔任嘉賓，身形瘦削的Adason會否是「Mr.Right」？Ava聞言笑說：「唔覺佢瘦喎！我哋係喺音樂會先認識，佢係好有才華、好有Heart嘅歌手，有交換電話，但私下好少約出嚟。」至於發展機會，她直言要深入了解才知道，但現階段未有「過電」，莫非她真的要等十年才派紅色炸彈？
快將推出第二隻專輯的Ava表示，今次花了年半時間炮製新碟，超過一半作品是親自作曲作詞，參與感較首隻專輯強：「今次多咗快歌，之前音樂會第一次跳舞，Sunny Wong幫我排舞、改頭換面，見上次大家睇我跳舞唔覺惡心，嚟緊都會陸續製作多啲跳舞快歌。」問到大學時玩跳舞的她會否轉型做跳舞歌手，她即表現抗拒地說：「絕對唔會，費事嚇親人！我會Keep住彈琴嘅形象。」
踩過界再出書
Ava曾於YouTube教美容，還教到街知巷聞，曾推出美容書的她今年將再接再厲於十月出書，但棄教護膚改教化妝：「每一Part都會有個主題，例如初次約會、分手應該化咩妝啱，基本上內容定晒，遲啲會招募Model。打算搵化妝同髮型師幫佢哋扮靚，畀人知道我啲妝唔係化自己先靚。之前莊思敏都話有興趣，但聽見要素顏見人即刻Say No！」
後記：全脂奶豐胸
羽翹早前因開騷壓力大兼病倒而瘦了一圈，自嘲「瘦到冇胸」的她透露獲名化妝師Gary Chung傳授豐胸招數：「就係每晚飲全脂奶！因為食脂肪類食物會成身肥，但係飲鮮奶就會肥喺個胸度，太瘦着衫真係唔好睇，依家晚晚飲奶豐胸。」
羽翹打算繼續以「鋼琴才女」姿態進軍內地市場，初步已見成效。
羽翹疊埋心水等35歲才結婚，現階段先搏殺工作。
羽翹將於十月再推出美容書教化妝。
羽翹早前在內地綜藝節目亮相後，微博粉絲即激增二千人。
羽翹以性感造型力谷首個音樂會，幸好努力沒有白費。
羽翹秘密練舞唱快歌，但無意轉型做跳舞歌手。