錫住JC恐「毀容」周秀娜咪咪打排球

周秀娜（Chrissie）、Jessica C.（JC）與傅穎昨日宣傳電影《熱浪球愛戰》，男主角羅仲謙未有現身。身穿Deep V裙的Chrissie大騷3吋「事業線」，而JC則谷出「小警鐘」，相比之下，穿黑色透視裝的傅穎毫無睇頭！

眾女即場示範打沙灘排球，JC瞓身救波，而Chrissie明顯錫身，不停避波，無奈「咪咪」還是慘食波餅，她說：「拍戲嗰陣，對住Jessica C.好尷尬，怕打中佢塊面，大家都係靠塊面搵食，惟有打落少少。（打瘀個胸？）周身都瘀啦！（頭先打波好錫身？）因為玩第一個遊戲嗰陣，高踭鞋跣一跣，好驚跌親。（個胸中波餅？）好正常，波來波往！」

至於身材明顯消瘦的JC自爆早前在加州度假，經常踩單車及曬太陽，為免「咪咪」縮水，她返港後將積極鍛煉身材。而傅穎則揚言為免被誤會鬥性感才刻意加上Tube Top，談及曾傳不和的過氣緋聞男友羅仲謙「冇影」，她說：「以我所知，佢係拍戲嚟唔到。（介意同場？）唔介意，為工作之嘛！合照都冇問題。（私底下呢？）私下嘅事私下解決啦！（解決咗未？）我依家生活幾好呀！」