王祖藍結婚　新娘不是李亞男

王祖藍昨日宣布8月假伊館舉行的「演嘢會」會將結婚囍宴搬上舞台，女友李亞男將會上台做嘉賓，問到會否假戲真做順勢求婚？他說：「我只係過吓請飲癮，未係時候！」

祖藍將於8月19至20日假伊館舉行《王祖藍咪咁扮嘢演嘢會Ⅱ》，昨日他以一身中式禮服打扮在酒樓舉行記者會，宣布內部訂購反應熱烈，決定於8月21日加開日場。

碌爆人情卡

祖藍透露演嘢會以愛情為主題，屆時他會做新娘子嫁給耶穌，伊館則變為大酒樓，宴請廣大市民出席他的囍宴：「今年真係太多人結婚，我一個月去七單！同埋講吓愛情嘢、初戀同離婚等等，到時會做到好足，迎賓、合照，甚至送客都會做，仲會有美點雙輝拎走添！」

祖藍表示碌爆人情卡，邀請無綫及英皇的好友擔任嘉賓，問到女友李亞男會否上台？他笑說：「今次係我結婚，但新娘不是佢！佢都係我愛情路上嘅一部分，所以都會上台。（順便求婚？）唔會喇！佢話唔准結婚住，我都係過吓請飲癮啫！（求婚唔成功？）唔係，未求！等事業工作穩定先啦！」

祖藍指上一次演嘢會有兒童不宜的環節，但原來有好多小朋友到場睇騷：「今次就係合家歡題材，啱晒闔府統請！（講埋鋒芝婚變？）未必會針對個別娛樂圈新聞，但係會講社會現象，例如好多親戚都離咗婚！」