Eason好想見霆鋒

謝霆鋒個多月來飽受婚變困擾煎熬，身為死黨的陳奕迅（Eason）力撐到底，將到馬國做宣傳的他希望與好友一聚。不過霆鋒向來寡言，對於鋒芝婚變，Eason至今仍一頭霧水。　"

鋒芝婚變擾攘個多月，栢芝不好受之餘，霆鋒在北京記者會的一句「不知怎麼繼續走下去」，更見他心力交瘁。同樣有家室的Eason，對於好友婚變一事似乎愛莫能助，只能力撐！Eason昨日宣傳電影《功夫熊貓2》時，為好友平反：「佢好多嗜好唔係淨係打機！（佢係咪好老公、好爸爸？）我冇乜見佢一家相處係點，反而諗自己係咪好爸爸，盡力啦！」又表示將會飛到馬來西亞，希望有空探望好友：「一陣要上機，去一個近排唔係好想去嘅地方，即係馬來西亞！不過我真係好想見霆鋒，好耐冇見喇！佢亦都好耐冇聽電話，哈哈！但佢平時都唔聽電話o架啦，惟有搵表哥（霆鋒助手）！」

「一直都幾氣和o架」

對於霆鋒婚變，Eason似是一頭霧水，他說：「唔關我事！不過佢拍緊戲，唔知阻唔阻佢。佢唔係好講嘢，真係唔知發生乜事！」問是否擔心霆鋒？他說：「唔好講咁多，做藝人有壓力！佢住得遠平時好少見！」Eason又無厘頭說看完卡通電影會心平氣和，問到會否提點霆鋒要心平氣和？他說：「霆鋒一直都幾氣和o架！」不過，他表示不會送電影戲飛給鋒芝的兩個兒子：「唔好喇！個個都追住佢哋，我先係主角！」並表示不擔心小朋友，只希望大家給霆鋒多點空間。問到囡囡有否與Lucas和Quintus玩？他說：「我同霆鋒熟啲！我哋試過一齊踎街賞月，佢係我其中一個最好嘅朋友。」

霆鋒馬國繼續開工

對於霆鋒在北京記者會的表現，Eason大讚一絕：「佢出嚟嗰日好有型，有換到衫！以前佢四個頒獎禮同一套衫，個頭又立黐黐，今次好乾淨！」另外，已返馬國開工的霆鋒昨日繼續拍攝新片《逆戰》宣傳片，雖然仍未解除婚姻危機，但他依然專心工作，把不快事拋諸腦後。據知，《逆》片還有幾場重頭戲由霆鋒孭飛，預計下月7日便會煞科返港，翌日繼續開工拍廣告。