Rick Chin堅稱湊仔有心得

樂意幫栢芝做「湊仔公」的化妝師Rick Chin昨晚出席活動，問到「湊仔」期間Lucas及Quintus可有表示很久沒見到爹哋霆鋒？Rick說：「冇提呢樣。（掛住爹哋？）都冇喎！但有話掛住媽咪囉！」他又堅稱湊仔有一手，勝任有餘。對於Lucas被指不上學，Rick表示世上有「私人教師」這回事，他亦會幫手教導兩位小朋友。談到日前霆鋒指栢芝表示還愛他？Rick只說：「我唔知栢芝，但睇電視，霆鋒都話愛栢芝㗎嘛！（身邊其他人係咪應該收口？）都唔應該講咁多，包括我都要收口！」他不認偏幫栢芝，只說幫理不幫親。

Eric Kwok：兩個都唔抵幫

同場出現的還有鋒芝死黨Eric Kwok，他直言身份難做，自己也被干擾而不開心，作為朋友見兩邊都辛苦，但卻幫不上忙，他有感而發：「上車易落車難，佢兩個結婚可以好快，都可以好快冇事，但搞到呢個地步，唔會咁易冇事。（離婚？）唔知，但佢哋冇停過挽救婚姻。」Eric否認鋒芝間有第三者，指兩人分開只是性格不合，問到是否栢芝被指太強？他即說：「霆鋒都唔弱，連床照事件都冇事，何況一張咁嘅機艙相？唔會咁兒戲！」至於鋒芝一對稚子，Eric說：「栢芝係盡力媽咪，霆鋒亦唔會唔理個仔。（栢芝話霆鋒唔理啲仔！）清官難審家庭事，外人唔應參與，唉！兩個都唔抵幫，但兩個都需要幫助應付今次難關。（霆鋒係咪好爸爸？）等Lucas大個問番佢。」