亞男愛食豆腐法拉筷子當簪

選美向來標榜「美貌與智慧並重」，佳麗除了以水着示人外，還要通過問答環節測試「墨水」。不少昔日佳麗對選美過程依然難忘，華姐亞軍陳法拉回想當年以筷子當髮簪應付問答環節，爆笑過關！

陳法拉傳統過關

名銜：05年國際華裔小姐亞軍

問答環節：「司儀問我點解用筷子好啲？我答筷子係中國傳統，仲可以做髮簪！」

難忘事：「跳舞！嗰時日日都要排舞咁滯，朝早6點幾起身，都幾辛苦o架！」

胡杏兒表情搭夠

名銜：99年香港小姐季軍

問答環節：「當時陳百祥叫我做喜怒哀樂表情，嗰時乜都唔識，盡量大膽同放！」

難忘事：「去葡萄牙拍外景，因為時差加埋訓練得好密，瘦到得102磅！」

陳庭欣高溫外景

名銜：10年香港小姐冠軍

問答環節：「問我點睇最低工資，我話28好意頭，仲話如果我當選就收38，輸咗就收58！」

難忘事：「去印度出外景，仲有喺決賽嗰晚播選美片段，睇到喊晒！」

李亞男笑死評判

名銜：05年國際華裔小姐冠軍

問答環節：「司儀問我鍾唔鍾意食豆腐？我話好鍾意，唔知點解評判笑到死！」

難忘事：「識到世界各地佳麗，同房好可愛，連蝦餃燒賣都唔識分！」

朱慧敏正義老公

名銜：04年香港小姐亞軍

問答環節：「問我揀咩英雄人物做老公，我揀咗個正路嘅大俠，讚佢有正義感！」

難忘事：「最難忘肯尼亞之行，同梁詠琪拍MV，我哋18個女仔喺瀑布前影相！」

馬賽新聞之花

名銜：08年香港小姐季軍

問答環節：「當時問我新科技帶來咩影響，我話新科技令生活方便咗，但叫大家唔好太沉迷！」

難忘事：「入選後好多新聞，嗰時讀緊書，同學拎報紙畀我睇話上咗頭版！」

呂慧儀抽中「大佬」

名銜：06年香港小姐季軍

問答環節：「嗰年叫我哋抽一個詞語嚟講吓，我抽中『大佬』，咪諗起哥哥好錫我，四海之內皆兄弟，四海之內皆大佬囉！」

難忘事：「選之前要入Camp，要紮木筏同行山，好似玩生還者遊戲，好大考驗！」

何傲兒敷Mask斷正

名銜：07年香港小姐旅遊大使

問答環節：「陳百祥問我環保，我記得答得好差，嗰陣硬晒軚，手震震！」

難忘事：「Daddy車我返公司，我喺車度敷Mask，畀記者影晒相，好搞笑！」

高海寧藍的疑惑

名銜：08年香港小姐旅遊大使

問答環節：「林敏驄問我點解海係藍色？我話海又藍、天又藍，咁咪海天一色囉！」

難忘事：「去加勒比海拍外景，有得搭郵輪好正！仲有上網睇片學西班牙舞，應付天才表演。」