Ana R.女人魅夠肩

女生不一定要騷胸晒長腿才能艷光四射，簡單的露肩露鎖骨都能散發美感。本地著名設計師郭慶彬認為Jessica C.只露肩膊及鎖骨已夠晒煞食，而

Ana R.則散發單肩魅力。

高分派

Ana R.若隱若現 評分︰9/10

評語︰「紅色長裙顏色好搶眼，頭髮嘅造型令肩線有若隱若現嘅感覺，有單肩嘅魅力，而且成個造型感覺好飄逸，就算冇騷事業線，個身形都好靚。」

Jessica C.煞食醒神 評分︰9/10

評語︰「條裙着得好靚，肩膊同鎖骨線條係佢嘅煞食之處，佢身形比例好啱着呢條裙，望落去個身段修長，而且粉紅色嘅長裙好Sharp好吸引，加上佢束起頭髮，更加凸顯到肩膊嘅線條。」

穩陣派

沈卓盈累贅平凡 評分︰5/10

評語︰「高瘦身形嘅佢着呢着條裙麻麻哋，A-line設計令佢睇落冇身形，效果一般。如果個吊帶位高啲嘅話會好啲，因為佢低胸、肩同鎖骨，焦點太多。」

趙彤要露不露 評分︰5/10

評語︰「佢身形修長，但條連身裙實在太長，佢Carry唔到。如果將條裙改短到膝頭會好啲，而且佢頭髮長度好尷尬，好似係想露肩又唔露咁。」

Jocelyn銷魂藍雀 評分︰7/10

評語︰「彩藍色嘅Tube Dress同佢古銅色嘅膚色好夾，裙嘅Cutting好靚，佢着得好稱身，只係簡單露T形鎖骨位，優美嘅肩線表露無遺，而且佢將頭髮放喺後面令身形線條更加突出。」

謝婷婷Tan色出位 評分︰7/10

評語︰「灰色吊帶裙好襯佢嘅古銅色膚色，而且肩位線條露得好靚，加上均稱嘅鎖骨，而且鞋嘅配搭令整個造型得體大方。」

熊黛林髮型騎呢 評分︰7/10

評語︰「佢黃金比例嘅身段着呢條簡單Tube Dress冇難度，成個肩膊線條好搶眼，但個髮型好古怪，髮型複雜而條裙Cutting簡單有啲唔夾，如果係直髮就更好。」

失手派

盧頌之無神斑馬 評分︰3/10

評語︰「佢細粒嘅身形着Tube長裙有衣不稱身嘅感覺，黑白色望落冇乜精神又唔夠Sharp，腰間條粗帶太過刻意同多餘，而且露膊唔襯佢，有一種好有肉地嘅感覺。」

袁彌明青春盡失 評分︰4/10

評語︰「本身條裙好成熟同充滿女人味，就算露膊頭同鎖骨，成個造型都成熟過頭，帶唔出一種年輕嘅感覺。」

Profile

郭慶彬（Ricky Kwok）從事時裝界多年，多擔任廣告形象指導，曾為樂基兒及熊黛林等設計造型，亦開設時裝店打造潮人，近來忙於籌備相展。