陳茵媺坐Mo車笑談車震

陳豪、陳茵媺、廖碧兒與林忠豪的四角緋聞早前鬧得熱烘烘，當時被指瞞陳豪搭上新歡的廖碧兒，原來三年前已斬斷情絲；而陳茵媺出席活動時被問有否與陳豪「車震」，即哈哈大笑。

身在北京的廖碧兒昨日接受長途電話訪問，被追問與陳豪（Moses，花名Mo）的感情瓜葛，她承認已分手三載，但表示感情事不想多提，總之大家有新開始，會留下美好的回憶，雙方再見亦是朋友。

既與陳豪甩拖，問到與林忠豪是否熱戀中？廖碧兒只說：「大家一直都係朋友。」再談到離開効力十年的無綫，她說：「總之簽咗新公司，係內地公司，不過都多謝TVB，因為冇佢就冇咁多人認識我。」對於早年拍劇傷腰仍死撐開工，期間又要出埠，她難忍痛楚而向公司請假，不料遭冷言冷語，碧兒昨日解釋：「我都係聽人講，都有唔開心。（加速離開？）係令我更加諗清楚要以自己行先，我唔會抹殺工作上嘅努力。」至於陳豪至截稿前尚未回覆。

收短訊好Happy

另外，陳茵媺前晚出席汽車活動，問到有否坐過陳豪車時，她直認：「坐佢車都幾有安全感。（有冇『車震』？）呢條問題好曳，哈哈，唔識答你。（你哋撈亂車揸？）我自己有車，不過鍾意做乘客多過司機。（佢傳訊息畀你？）有呀！Happy同Friendly嘅，內容就唔話你知。」她透露陳豪尚未提出第二次約會，但笑言不會催對方。