栢芝密友 數「好爸爸」做戲

一直封嘴拒談婚變的張栢芝，前晚離港往德國工作，昨日其助手Andy代主「開腔」，狂插霆鋒在屋企掛住打機唔理妻兒，又出律師信要求見仔，目的是逼栢芝開口離婚，鋒芝正式擘面！

擾攘逾月的「鋒芝婚變」進入高潮，一直玩低調的栢芝，自知無力挽回老公的心，離婚似乎已成定局，惟有爭取一對寶貝仔的撫養權，栢芝繼日前被本報撞破湊囝囝到公園玩後，前晚又現身機場飛德國，直至昨日，她更借助手微博主動出擊，狂數霆鋒唔理仔、使栢芝錢、利用栢芝及逼栢芝開口離婚4宗罪，在全世界面前狠狠摑他一巴！

繼狄波拉好友查小欣在電台爆料後，前晚與栢芝一同飛德國的女助手兼中學同學Andy，昨午在微博轉載4篇由網友Yuki_Lee發表的千字文，並留言：「這就是"事實"」Yuki自稱是栢芝的好友，指栢芝「唔想頭家就咁散」才一直啞忍，卻飽受無理指控，身為好友的她替栢芝心痛，決定將事實真相說出來。

為打機冷落妻兒

Yuki指第1宗罪是「唔理仔」，她寫道：「謝霆鋒得到最佳男主角呢個獎真係實至名歸……喺屋企亦都做戲，你哋覺得謝霆鋒一定係一個好爸爸好老公啦，實情係佢除咗喺產房出現過之外，喺屋企完全冇理過兩個仔，佢係可以個仔行過佢身邊都可以當見唔到，淨係掛住打機，可以自己一個對住部電腦成日都唔同老婆兩個仔講半句說話……個老婆喺邊唔知，個仔病唔知又唔理，咪又係栢芝一個人搞掂。」

第2宗罪是「使栢芝錢」，反駁栢芝「陰乾」霆鋒5億身家的傳言：「你哋話栢芝貪錢？你知唔知謝霆鋒依家坐緊部保母車都係栢芝送畀佢，佢手上戴嘅錶幾十萬，又係栢芝送畀佢。」

第3宗罪是「逼栢芝開口離婚」：「謝霆鋒借個阿媽把口講晒啲嘢出嚟，目的就係逼栢芝開口同佢提出離婚……將所有罪名推晒畀栢芝，如果佢真係一個好爸爸、好老公，點解放假嗰幾日都唔見吓對仔同老婆……電話都冇個。」文中還踢爆霆鋒出律師信要求見兩個仔：「法律上謝霆鋒同張栢芝依然係兩公婆，從來冇簽過任何離婚甚至分居紙，見兩個仔寧願出律師信都唔打個電話畀老婆……咪又係逼栢芝開口同佢離婚。」

拉姑要仔唔要乸

第4宗罪是「利用栢芝」：「謝霆鋒最叻就係利用身邊人為佢做事，好似2002佢頂包事件，開審期間不停叫栢芝為佢做呢樣做嗰樣，一知道唔使坐監，咪即刻一腳伸開栢芝。」

文中連狄波拉亦被株連：「狄波拉同人講話栢芝冇權要兩個仔o架，佢話兩個仔係姓謝，係屬於謝家，栢芝只係負責生。」Yuki指栢芝為了保護兩個仔，甚至盲目維護老公形象，努力去維繫婚姻，但有人卻處心積慮，唔理傷害人都要達到自己自私目的。至於栢芝經理人Emily亦在微博力撐道：「人是有底線的，單方面想維護家庭而啞忍是沒用的，到頭來只換來每天受到謝家傷害及中傷，好恐怖！」