梁靖琪向志偉度水冧「老公」

曾志偉拉隊抵達日本耍樂，以消除港人對日本核災的憂慮，振興當地旅遊業。昨日他率領呂慧儀、陳嘉桓、梁靖琪（Toby）、洪天明、江欣燕、雪梨兒子徐偉棟、陳寶珠兒子楊天經等先到秋葉原參觀，並參加當地旅行團，之後一行人到大型百貨公司購物。

呂慧儀買唔到底褲

女士主攻化妝品專櫃，大掃指甲油及化妝品，陳嘉桓說：「今次係第三次嚟日本，女仔梗係貪靚，特別鍾意行呢類化妝雜貨店，連指甲油都有好多唔同牌子選擇。」呂慧儀則表示幾乎每年都會到日本潮拜，預算花五位數字購物：「日本乜都靚，但今次最想買內衣褲，可惜呢度搵唔到，但相信未來幾日都會去好多購物熱點。（擔唔擔心核輻射？）唔驚，嚟得玩就唔會擔心！」購物之餘，眾人亦不忘玩自拍，昨晚張美妮便上載一張眾人嘟嘴扮Cutie日本妹的大合照。

年底結婚的Toby則靜雞雞走到男士用品區購物，並選了一大堆貨品，但發現沒有帶備足夠現金，即場向志偉借了一萬日圓（約一千港元），她尷尬地說：「我要學做賢妻嘛！一定會還番錢畀『爸爸』志偉o架！」洪天明透露未婚妻周家蔚稍後會到日本會合大隊，並已預備四、五萬港元給她瘋狂購物。