郭力行隱閉9個月走出谷底

郭力行自爆曾因失戀自閉家中，做「隱閉青年」長達九個月，同時亦失控暴飲暴食，暴脹至180磅，幸得心理醫生協助，並憑意志走出陰霾。

入行8年的創作歌手郭力行（Rico）形象乖巧，是一名陽光男孩，在劇集中專演好人角色，但他坦言自己也有黑暗及憂鬱的一面：「我幾年前試過失戀，人生又遇上好多問題，搞到匿埋喺屋企九個月。（遇上咩問題？）可能因為性格極端，成日問『點解我唔得』，又鍾意同人鬥，搞到心理好唔平衡，所以一遇上問題，就暴飲暴食，唔出街，好Down、好Hea，最後肥到180磅！」

後來Rico下定決心改變，加上心理醫生協助下，終成功走出谷底，180度大翻身，連事業也重現起色！問他失意時有否找圈內朋友傾訴：「其實自己嘢，好少同人講，不過好彩我真係有好多朋友。（例如？）吳卓羲，佢叫我唔好咁執着，佢份人好好、冇架子。（佢成日畀人話溝女？）一定唔係！佢成日同男仔玩。」另外，Rico透露與吳卓羲前緋聞女友官恩娜（Ella）相熟，問到他們拍拖時是否曾一起出來玩？他尷尬地說：「佢哋啲嘢唔講喇！係一大班朋友玩，Ella嘅個性好真、鼓勵性好強！」

搵女友要共患難

提到感情生活，Rico說：「冇呀！我成日幻想，希望有一個可以係當我破產時，都好愛我嘅女仔，同埋唔會介意錢銀多少。（香港難搵？）係呀！我覺得日本女仔幾好，因為我入行前同一個好好嘅日本女仔一齊，可惜因為語言問題最後散咗。」他表示現時工作為上，感情事先放一邊。