崔建邦首日做PA廁所開工

31歲的崔建邦由低做起，由昔日金牌司儀到今日PA，九千蚊人工都照做，全拜他涉打女友及醉駕所賜！昨日他首日以PA身份為藝員同事「服務」，態度積極，揚言要「做好呢份工」！

崔建邦（Amigo）昨日首日以助理編導（PA）身份為無綫新劇《ATF反恐》開工，一班演員包括吳卓羲及陳展鵬等見到他，無不愕然！但十分欣賞他能屈能伸。不過，Amigo在古裝街男廁開工時很嚴肅，面對記者追訪，工作人員都為他擋駕，Amigo只說：「多謝關心，我只想講我會做好呢份工，會努力，其他唔講！」

王賢誌驚聞「仇人」落難

至於對Amigo不離不棄兼上門過夜陪傾偈的唐詩詠，昨日為新劇《拳王》開工，她說：「之前都有聽聞佢返嚟做PA。（支持？）所有朋友我都支持。（遇到尷尬？）應該唔會，大家都係做嘢。（擔心佢捱唔到？）要問番佢。（得九千蚊人工？）依家唔係介意呢啲嘢嘅時候，做好自己先。」而獲Amigo「服務」的吳卓羲說：「佢做PA我都係啱啱先知。（尷尬？）都係為工作，大家應該支持佢。（指點佢？）我都要請教佢！」提到緋聞女友張馨予默認拍拖，他說：「佢冇親口講，我唔會回應。（林峯玩你叫你哋一齊睇演唱會？）咁大鑊？佢畀飛我咪帶阿媽睇囉！」而展鵬見到Amigo大感愕然：「能屈能伸，男人係咁o架啦！唔會尷尬！呢行最辛苦就係做PA，大家應該支持佢！」

另外，曾被指是Amigo「仇人」的王賢誌，知道對方做PA即驚訝地說：「吓？真係o架？上星期仲聽聞佢去其他台做，又話佢幫志偉拍電影，我哋冇聯絡，不過做PA可以鋪排電影發展，證明佢仲好有熱誠。（得九千蚊人工？）無綫藝員都唔高人工，何況PA！（樂易玲關係？）應該唔關佢事，我知PA辛苦，佢好大勇氣，最難面對係身份嘅轉變。」