洪朝豐8月潛龍復出

洪朝豐宣告8月復出，獲數碼電台聘請主持最拿手的吐心聲節目；曾因患抑鬱狂躁症鬧爆舊愛寶詠琴的他，今日絕口不提對方。

被封「四大癲王」的洪朝豐，06年離開精神病房後即杳無音訊，直至最近終於蒲頭！他依舊居於藍田屋邨，雖然樣子滄桑不少，但精神飽滿。提到當年的「洪寶戀」搞到滿城風雨，他更因患病而狂數寶詠琴，問到現在有否想起故人？他說：「唔想講，好耐以前發生，人已經唔喺度，唔想提。」

12年沒有開咪，洪朝豐正式宣告復出，但他笑言猶如置身夢中：「有數碼電台搵我主持吐心聲節目，8月中會開咪，復出嘅感覺好似發夢！（酬勞好好？）唔可以講。（有冇信心再創高峰？）唔敢講，做咗半世紀人，明白成功係天賜，失敗係非戰之罪，係個天想你失敗。」

一世食藥

由於患抑鬱狂躁症，洪朝豐曾嘗盡人情冷暖：「自己一直好想再開咪，儘管呢個社會成日話唔應該歧視精神病人，但我睇唔到任何曙光接納我！（依家個病點？）06年出院之後已經完全康復，但要一世食藥，唔食就復發，仲唔驚咩？唔可能畀第三次抑鬱狂躁症復發！」

洪朝豐坦言出院後的半年沒有工作，要家姐及朋友照顧，故現在只會認命，隨遇而安。對於同樣被封為「癲王」的蔡楓華復出，他笑了笑再說：「恭喜佢，為佢開心。」