功夫新星鬥騎呢陳嘉桓冇眼睇爆肌林峯

有見甄子丹爆紅，無綫舉辦功夫新星比賽，可惜如「豬腩李小龍」等騎呢之星充斥，而「爆肌林峯」被彈到一文不值，林峯緋聞女友陳嘉桓亦指似林峯都冇着數！

近年香港掀起一片功夫熱，無綫因此舉辦《功夫新星》！昨日舉行的招募行動中，參賽者不乏打得之人，但騎呢之星卻成為全場焦點！參賽者鄧簡文穿上李小龍的經典黃黑外套，挺起大肚腩亂舞雙節棍，令人忍俊不禁！而另一位參賽者鄭裕軒骨瘦如柴，卻學人打詠春，可惜身形似紙板，打起來拳拳乏力！

原來打得又睇得都會出事，另一大隻參賽者羅浩銘雖然貌似林峯，打起跆拳道有板有眼，可惜全程頭耷耷，被有「魔鬼評判」之稱的國術裁判彭志銘鬧到一文不值，連同樣身為評判的林峯緋聞女友陳嘉桓及師兄杜宇航亦冇眼睇，嘉桓指並非識打詠春才能吸引其注意，亦會睇埋外形，問到是否要似林峯？她說：「打功夫唔使個個一樣樣嘅！」再問到揀男友是否要似林峯？她說：「唔會規限係乜嘢樣！因為大家嘅樣唔同！」

MC Jin冷落嬌妻

另外，杜宇航稱早前已到新加坡為節目嚴格揀蟀，又透露暑假忙於為電影宣傳，問到可有加片酬？他說：「比之前多好多，大約有七位數字！」至於主持歐陽靖（MC Jin）表示最近忙於為新劇《潛行狙擊》開工，冷落嬌妻。而香港先生翟威廉（William）亦有到場支持「爆肌林峯」，據知同行的蕭家浩已入圍香港先生決賽。