鋒芝分開過節各行各路

自鋒芝傳出婚變後，謝霆鋒日以繼夜在吉隆坡開工，而栢芝昨晚煞科後返港陪Lucas，但細仔Quintus則由嫲嫲照顧，一家四口在今日的端午節亦未能團聚！

鋒芝每逢大時大節都會抽空溫馨一番及陪兒子享受家庭樂，可惜隨着婚變傳聞愈鬧愈大，鋒芝共度家庭樂的時刻未知何時再現？今日端午節，霆鋒寧留在吉隆坡工作「避世」，而昨晚煞科的栢芝則趕及由堔圳返港陪Lucas過節，不過細仔Quintus則由嫲嫲拉姑照顧，一家四口「支離破碎」，未能在佳節團聚藉天倫之樂化解婚變危機！

街坊嗌「栢芝」贈「慶」

連日為《逆戰》危險動作搏到盡的霆鋒，以此自我催眠，奈何難逃熱心街坊追問栢芝情況！昨午霆鋒與周杰倫在街頭藥房取景拍攝，霆鋒未埋位時坐在藥房門口煲煙及讀劇本，不停望四周環境又與工作人員傾偈，心情不錯。由於劇組封街拍攝，吸引二百人圍觀，有市民在樓上居高臨下睇拍戲，有女粉絲則坐在茶檔睇偶像，更有街坊在對面街大叫：「張栢芝會唔會嚟？」不過，霆鋒「聾耳陳」上身，對提問一概不理。而周杰倫的頸上貼上紗布，手部滴血，手持裝有藥物的膠袋從藥房走出來，登上白色車，現場有臨時演員扮巡警。

至於有傳栢芝在堔圳煞科後，會利用一星期的假期飛往吉隆坡箍煲，其後才為《河東獅吼2》開工。《河》片將在杭州及寧波等地取景，預計栢芝於下月1日才投入拍攝，但據知她在月中會先到內地作準備，與馬偉豪導演試造型及傾細節，昨晚煞科的她雖然仍有時間與霆鋒修好，但未知會否付諸行動。

另外，有傳栢芝以6千8百萬元搵中港經理人公司簽約5年，但無人問津，栢芝的經理人拒絕回應傳聞，據知為淡化婚變傳聞而封口。