梁洛施返閨保鏢護駕

梁洛施帶同三名愛兒返港，前晚與友人到西貢飯敍，其後到朋友的獨立屋。她坐凌志房車離開時，沿途有一輛七人車護駕。

梁洛施（Isabella）近日帶同三名愛兒秘密返港！前晚與友人到西貢食飯敍舊，其後在保鏢護送下，乘凌志房車到蔣怡男友翁狄森的西貢獨立屋。Isabella主動分蛋糕給友人，而她亦密密食唔停。約凌晨二時，Isabella乘凌志房車離開，沿途有一輛七人車掩護。期間大批記者追訪，其座駕不停在港島東區「遊花園」，最後駛至前男友李澤楷的電盈總部停車場，再從秘道離開。

暫未計劃復出

記者訪問其發言人盧覓雪，問Isabella今次返港會逗留多久？她說：「唔講啦！今次返嚟探吓親人同朋友。（見李澤楷？）唔講啦！總之做平常人會做嘅事啦！（點安排工作？）暫時未有片商洽談，不過Function就好多，但暫時都未有任何工作安排。（小朋友有冇返嚟？）尋晚食飯梗係唔可以帶出嚟啦！不過佢哋咁黐媽咪，又點會放低佢哋呢？」詹瑞文亦透過電話表示前晚是跟舊學生敍舊，指Isabella自稱早前在荷里活拍片猶如上了一課，雖然喜歡拍戲，但暫時沒有計劃復出。