鍾嘉欣哭震全城 陳豪慘遭追殺

鍾嘉欣前晚在劇中受騙嚎哭，嗌到聲嘶力竭，令逾百萬網民為之動容，在討論區及Facebook洗板力撐她，更為Miss Koo出頭，揚言要追殺「賤男」陳豪！

鍾嘉欣外形頂呱呱，可是演技一直被指太幼嫩，被局限於演乖女角色，直至近日憑劇集《點解阿Sir係阿Sir》劇中Miss Koo一角才「爆出」！在前晚播出的第27集《點》劇中，嘉欣知道陳豪飾演的羅Sir是臥底，梨花帶雨講出一句句對白「恭喜你羅Sir……冇人愛我……你哋全部都係假㗎！」鬼哭神嚎，七情上面，令不少網友動容，群起在討論區讚她演技出色及更力撐她挑戰視后，令視后之爭添變數，佘詩曼並非坐定粒六！

討論區、Facebook及無綫官方網頁上，網友以「洗板式」留言為嘉欣壯聲勢，而無綫官網錄得《點》劇有110萬點擊人次。有網友表示看到Miss Koo崩潰一哭，連「男人老狗」都哭掉一公升眼淚！反觀被公認為「筍盤」的陳豪，因角色欺騙感情被封為世紀賤男，有人揚言要追殺賤男陳豪，認真無辜！

冇諗過攞視后

昨日嘉欣接受電話訪問時表示有留意網上留言，坦言從未想過會有絕佳反應，問到拍攝這場喊戲是否很辛苦？她說：「都唔係！我夠時間做功課，對角色好投入，又有陳豪帶我入戲，拍兩Take搞掂。」不過，她揚言從未想過奪視后：「真係冇諗過！反而好想攞我最喜愛女角色，呢個角色成功，可以加強我嘅信心！（約同劇演員睇大結局？）唔得喇！嗰日我要去馬來西亞做嘢，希望觀眾支持！」她認為大家覺得陳豪是賤男，證明他演出成功。

至於被封為賤男及遭「追殺」的陳豪說：「啋！大吉利是咩？做戲之嘛！起初我都有同監製商量過角色，佢話會畀到個位我證明欺騙感情係迫不得已，所以我都唔擔心嘅！」此外，無綫和廣管局分別接獲兩宗投訴，指劇集帶出欺騙感情的意識，不宜在這時段播出。