陳慧琳打造Pink Baby：囝囝姣得起

陳慧琳（Kelly）休養兩個月後，近日復工，她坦言做媽咪後經常瘋狂購買童裝給囝囝劉昇，鍾情粉紅色的她說：「依家唔姣，唔通大個先姣咩？」

陳慧琳、熊黛林（Lynn）、高圓圓、周秀娜、詩雅及泳兒等前晚盛裝出席Tory Burch的慶祝晚會，休息後復工的Kelly以橙色連身裙示人，非常搶眼。她坦言陸續投入工作，下周會食海味補身，並表示剛在上海趁工作空檔瘋狂血拚：「全部都係買童裝畀囝囝劉昇（蝦餃仔）。（老公詐型？）佢淨係叫我唔好買粉紅色，但我覺得阿仔姣得起吖嘛！依家唔姣，唔通大個先姣咩？」此外，Kelly透露近日盡量減少站立，日內將出發到廣州任表演嘉賓，屆時會演唱快歌，但不會跳勁舞。

Lynn唔認惡

至於Lynn穿上4吋高踭鞋示人，格外高人一等。提到導演彭順有意開拍新戲撮合她跟緋聞男友郭富城，她說：「係咩？我冇聽過，如果角色啱，我唔介意嘅。（城城話你惡啱做女警？）乜我好惡咩？可能大家睇過我《葉問》演出，個角色惡啫，我唔係惡，有時遇到唔如意事會忟囉！」問到「城嫂」地位是否穩如泰山？她笑說：「我唔係城嫂，我未結婚仲係單身。（未來城嫂？）未來嘅事冇人知，但我會努力爭取自己幸福。」