王菲掃勻中環老銅興奮自拍

將於明日在廣州開騷的王菲，昨日來港穿梭中環及銅鑼灣名店，逛了3小時已掃下大批戰利品！心情大靚的她，更興奮得與化妝師Zing隨街自拍！

現正忙於舉行巡唱的樂壇天后王菲，將於明日及後日在廣州開騷，一向愛來港購物的她，刻意提早兩日秘密來港掃貨，今日才起程往廣州準備。昨午2時半，戴上大黑超、身穿鮮藍色上衣、喇叭腳牛仔褲的王菲，與御用化妝師好友Zing及數名男女友人現身中環行街，吸引不少人注目！

向來Cool爆的王菲，全程笑容滿面，更拿着熱咖啡邊行邊飲。一行人連掃名店睇衫睇手袋，獲店員熱情款待。原本睇得興致勃勃的王菲，當發現鏡頭後，即躲入店內的暗角位置，其後失去影蹤，估計由秘道閃走。不過轉頭她又在附近名錶店出現，逗留半小時已有斬獲。步出時，她與Zing密密傾，Zing拍完採訪情況又跟王菲自拍。之後他們再往銅鑼灣置裝，王菲沿途跟友人傾到忘形，行過了座駕竟懵然不知，搞到助手大叫：「呢邊呀！」王菲即掩嘴哈哈笑，最後登車走人。

B哥邊食邊睇片

另一邊廂，鍾鎮濤（B哥）與女友范姜及一男友人在中環午膳，期間B哥拿出電話播片，與友人邊食邊睇，間中亦有說有笑，逗留約1小時才離開。至於大美人鍾楚紅亦於附近行街，當她發現鏡頭時，即加快步伐離開。