報警後有覺好瞓　沈卓盈籲非禮受害人咪啞忍

無綫女藝人沈卓盈前晚深夜報警稱被中醫摸胸後，昨日在微博呼籲其他女受害人挺身而出！徐淑敏則表示好友如釋重負，終於有覺好瞓！

沈卓盈（Jess）前日出席活動時透露，因傷頸往睇跌打，卻報稱被中醫師摸胸！前晚她在好友徐淑敏及經理人陪同下到旺角警署報案，經過3個多小時錄口供後，於凌晨3時許離開。她離開時表示事件已交由警方處理，不便透露進展。報警前，Jess已在微博上大鬧該醫師，昨日她再在微博留言，希望「那些人」會得到法律制裁，並呼籲其他被「欺負」的女性不要啞忍，羅敏莊亦留言力撐。記者昨日致電Jess，但未獲回覆，其經理人則表示不便回應。至於警察公共關係科表示，事件已列作非禮案處理，並交由旺角警區刑事調查隊跟進，暫屬調查階段，未有人被捕。

徐淑敏爆情緒激動

徐淑敏昨日受訪時透露是她建議好友報警：「Jess擔心被指博宣傳，我勸佢講出嚟畀其他女仔警惕！今日通過電話，佢終於瞓得着，心情好咗！」她又爆Jess錄口供期間情緒激動：「佢好激氣！（有冇喊？）你問番佢啦！」至於胡杏兒前晚在微博建議Jess報警，昨日她說：「唔出聲就會再有受害者！我多數揀女醫生，睇男醫生時都要有女護士在場，有咩事會起飛腳踢佢！」黃宗澤昨日出席活動時亦大表贊同。