陳慧琳貴婦Ana R.夏娃

近日不少女星喜愛穿斜膊裝和Tube Top大騷纖瘦身形，不過時裝判官張學潤（Nelson）說：「斜膊衫要骨架細，夠瘦先着得靚。」斜膊衫比較難Carry，如果骨架太大，只會變得更大隻，他稱讚Ana R.的Halter Dress盡顯鎖骨美態，而劉嘉玲亦靚到痹！

Ana R.襯到絕 7分

評語：Ana R.着出夏天嘅感覺，好有女人味，好啱佢身形，鎖骨位亦顯得好靚、顏色好Sharp、襯佢，而Metallic顏色嘅鞋好穩陣。

陳慧琳夠優雅 7分

評語：陳慧琳夠瘦，着斜膊衫都唔大隻，件衫有特色，恰如其分，畀人優雅嘅感覺。不過可以襯對簡單啲嘅鞋，好似黑色尖頭鞋會型啲。

熊黛林着錯褲 6分

評語：上身係一件好靚嘅Top，可惜下身襯得唔好，條黑色皮短褲有啲俗氣，嘥咗件衫，拉低級數，如果襯黑色短裙會好啲，有番格調！

陳靜大隻妹 6分

評語：DaDa（陳靜）着咗呢條裙顯得有啲大隻，換條幼腰帶會更靚，令條裙睇起嚟線條簡單啲，如果骨架細啲嘅女仔着呢條裙會更好。

莊思敏玩特別 8分

評語：套衫OK！顏色好特別，同佢嘅膚色好夾，雖然款式簡單，但都着得好好睇，望落舒服、自然。

羽翹俏公主 7分

評語：套衫好有少女味，公主款剪裁，但羽翹條腰短，如果條裙上身改短一吋就啱啱好，依家略嫌長咗少少，呢條裙啱身形更高嘅人。

陳嘉桓最嘥料 7分

評語：佢年輕同身材均勻，各樣條件都幾好，但咁着就嘥咗，形象唔夠鮮明。雖然條裙有公主Feel，但佢年紀咁細，衣着太保守欠時代感。

李嘉欣骨感美 7分

評語：正常！冇乜驚喜，好安全！嘉欣夠骨感，斜膊衫都冇問題。

劉嘉玲靚爆鏡 9分

評語：嘉玲近十年都冇失過手，幾乎每次打扮都恰到好處，有女人味又不失時代感，各方面都好靚！

張學潤Profile

著名時裝設計師兼指導張學潤（Nelson），在娛樂圈打滾近廿年，審美眼光獨到，評衫作風大膽敢言，在行內有「時裝判官」之稱。