Alice B.劉心悠追求港式愛情

港女談港男，往往彈多過讚，但「台灣美眉」劉心悠及「混血甜心」Alice B.卻剛剛相反，異口同聲盛讚港男孝順兼有安全感，揚言要搵他們做男友，來個愛情Crossover！

年僅20歲的英泰混血兒、「Canon第四代甜心」Alice B.，去年底憑與葛民輝合作的相機廣告彈出，其後火速升呢廣告商新寵。3年前毅然隻身來港發展的她，原來全為一個「情」字︰「首次嚟香港係同人拍拖，覺得呢個地方唔錯，可以話一見鍾情，所以決定喺度發展！」回想對香港的第一印象，她坦言「Amazing」︰「呢度嘅建築物好靚、景色好吸引、人又Nice，總之氣氛好好！」除了夜景吸引外，她笑言對港男「齋講唔做」的性格相當深刻︰「喺倫敦的男仔好危險，講得出做得到，真係會捉你去後巷做啲你唔願意嘅嘢！反而香港嘅男仔得個講字，唔會去做，感覺上安全啲！」對港男讚不絕口的她，不介意再添「陀地」男友︰「我為擁有亞洲人血統感到驕傲，當然會同亞洲人拍拖、結婚甚至生小朋友！」

金絲雀No Way

擁有天使面孔魔鬼身材的Alice B.，早前被拍得與男友人狀甚親暱，但她強調未有追求者︰「我都想有另一半！因為生活除咗做嘢都要有愛情Balance。（擇偶條件？）最緊要幽默同Gentleman，我接受唔到送禮物畀我嘅男仔，買嘢我會自己賺錢買，如果我收咗佢禮物，之後大家反面，佢問我拎番咁點呢？」她透露早前拒絕了男友人送贈的澳洲機票：「之後喺個活動度撞番佢，已經有女朋友，雖然個女仔珠光寶氣，但我冇妒忌，反而慶幸冇接受佢送嘅禮物！」談到對港女印象，她說︰「其實我嘅男性朋友多啲，香港女仔感覺壞壞哋，好似我之前喺英國咁壞、咁Cool。」

搏命做吸金

憑廣告一炮而紅的Alice B.相信幸運非僥倖︰「香港市場競爭大，所以我會付出110%努力！」短時間已賺得6位數的她，希望回泰國買樓孝敬母親，認真孝順！

後記：寂寞‧交心‧真朋友

Alice B.性格活潑，令整個訪問在笑聲中進行，個性樂天的她驟眼看似易識朋友，但事實恰巧相反︰「我一個人嚟香港，冇朋友、冇親人，覺得好寂寞，雖然之後識咗好多新朋友，但坦白講有九成係『Hi-bye Friend』，得一成係知心友，喺我遇到困難時會幫我。」

近年作多元發展的劉心悠，私生活卻「Dry過沙漠」，由台灣來港發展多年的她，閒時選擇做「宅女」，在圈中認識的男性友人寥寥可數，問到對港男印象？她說︰「我喺香港唔係好多朋友，所以好少同男仔接觸！但我身邊嘅男友人或者合作過嘅男星都好孝順好乖！」芸芸男藝人中，她盛讚任達華是絕種好男友︰「華哥係一位好好先生，我將來的另一半好似佢咁就好喇！」至於港女，心悠與其他人想法一樣︰「香港女仔好獨立，鍾意打扮，朋友都冇『公主病』，唔係港女！」

啱Feel即閃婚

出道時曾俘虜不少宅男的心悠，偏偏是緋聞絕緣體，她坦言要追求天長地久的愛情︰「我嘅感情觀係一對一，唔容許鍾意第二個！」今年踏入30大關的她，真命天子尚未出現，但她仍靜待緣分降臨︰「順其自然啦！我唔會定個框框要求男友係咩人，緣分要嚟就會嚟！」雖然多年來從沒刻意尋找另一半，但她亦憧憬組織幸福家庭︰「我一定會結婚，因為家庭對我嚟講幾重要，事業只係生命中一部分，唔係全部！」並揚言若遇到「Mr. Right」不排除「閃婚」：「話唔定我會閃婚呢！因為唔需要理其他人Yes定No，亦都唔關年紀事，自己想做就做！」

挑戰當磨練

感情空白正好提供專注工作的「心力」，心悠說：「Artist要有挑戰同磨練嘅機會，我好想做啲未試過嘅嘢！」早前處女演出舞台劇《直子小姐》的她，希望再接受新挑戰︰「要搵啲有新鮮感嘅嘢做，如果啲角色之前做過就要考慮，因為未必會有興趣！」問到會否擔心給人「揀Job、耍大牌」等感覺，心悠解釋只想帶給觀眾新鮮感，順道趁揀Job空檔返台探家人︰「之前太忙，好少見屋企人，其實我好掛住佢哋！」

後記：率性‧童真‧大頭蝦

訪問當日，心悠以短裙襯高踭鞋上陣，但率性的她因被高踭鞋「銀親」，遂向攝影師說︰「可唔可以唔着高踭鞋影呀？」最終獲准除鞋及赤腳拍照。完工後，童心未泯的心悠即赤腳跑往穿回私伙平底拖鞋，豈料數十分鐘後才發覺忘記取回高踭鞋，要折返拍攝地點，認真大頭蝦！