糖妹冧笑發功搶女神寶座

組合糖兄妹的黃山怡（糖妹）被樂瞳搶走「宅男女神」寶座，為挽回宅男的心，她昨日冒住拗柴危機以四吋斗零踭襯熱褲出席活動，更多次露出招牌笑容搶分！

糖妹出道時憑其嬌滴滴身形俘虜萬千少男心，獲網友封為「宅男女神」！不過糖妹近日進軍日本搵真銀，令一眾宅男變心改捧「巴辣學生妹」樂瞳，更將她飛出「宅男女神」榜三甲！糖妹見狀即發功，昨日出席活動時穿上四吋斗零踭，還罕有地以熱褲騷美腿上陣，更主動走近台邊玩親民！

靠糖兄保護

另一方面，活動上糖兄妹與歌迷合照，問到會否擔心遭抽水？糖妹笑說：「唔驚！糖兄識打泰拳會保護我！」而被指是宅男公敵的糖兄說：「太抬舉我喇！有事梗係要保護佢！（唔驚宅男搞事？）唔驚！今日好多都係歌迷。」糖妹搞笑地插嘴說：「有事我就彎低身閃開！」

糖妹表示今年很多時間在日本發展：「好少時間喺香港，一返嚟就好想同歌迷接觸，嚟緊又忙製作新專輯！」而獨留香港的糖兄坦言，糖妹不在港時他都會留在錄音室：「作歌同做製作。（糖妹唔喺身邊冇咁煩？）兩睇啦！有時寫歌都會問佢意見。」糖妹亦透露年底將在Star Hall舉行音樂會。