陳茵微呻冇Feel

陳豪終於認追陳茵媺，但她昨日甜笑呻感覺不到其追求，皆因兩人只靠電話及SMS傳情，陳豪隨即表示會檢討！

文：影視組

自從與「筍盤」陳豪傳緋聞後，無綫姐仔陳茵媺（Aimee） 工作量不斷「攀升」，昨日以代言人身份出席化妝品牌記者會。問到陳豪親口承認正在努力追求她，Aimee甜笑說：「係咩？真係未感覺到，感覺到話畀你哋知！（你點樣先覺得一個男仔追緊你？）感覺囉！唔係要規定做啲乜。（依家日日傾電話？）有傾電話亦都有發短訊，但唔係日日。」並直言不是需要收花示愛的人，最緊要順其自然。記者追問陳豪是否「Mr.Right」？她笑言未清楚，並強調至今未有單獨約會：「冇、冇、冇！大家呢排都忙，佢有話請食飯，但未就到時間。」

提到無綫臨時演員罷工要求最低工資，問Aimee將來會否向陳豪要求最低家用？她笑說：「劇情要慢啲，轉得太快啦！依家仲係認識同了解佢嘅階段。」

「努力加檢討」

至於男主角陳豪昨日出席活動，被問到Aimee直言未感受他的追求，他說：「都係嗰句『努力中』，認識多啲先。（下一步行動？）唔話畀你聽，係秘密！（佢話好多追求者但冇姓陳！）都係努力中，我會努力加檢討。」並透露周日將與母親吃飯慶祝，記者即追問會否叫Amiee同行，他笑說：「我輸畀你哋啦！（行外母政策？）唔知！你哋都講晒啦！（約食飯？）未！（傳短訊？）少少啦！（你都好含蓄！）你攻我咪守囉！」至於正式拍拖可會公開？他說：「唔知呀！都係低調啲。」

另外，Aimee完成該活動後低調離開，並向陳豪出席活動的方向走，未知是否跟他見面？