陳美詩闊佬氹「奶奶」

陳美詩（Macy）與男友孫耀威感情穩定，並已踏入談婚論嫁階段，日前她趁母親節出動「奶奶」政策，揀選價值約萬元的名錶，為冧「奶奶」絕不手軟！

無綫小花陳美詩與歌手孫耀威（Eric）拍拖多時，感情穩定，更曾傳婚訊，而Eric早前往台灣工作前亦向女友大派定心丸：「我都唔細，唔會花心！」雖然最近有指憑處境劇《誰家灶頭無煙火》上位的男藝人陳智燊狂追Macy，但Macy不為所動，與Eric情比金堅！

細心揀梳化

日前Macy相約好友梁嘉琪到荃灣一間商場Shopping，為母親節做準備，她們逛錶行、玉器店及傢俬舖，Macy行「奶奶」政策，買份厚禮冧未來奶奶！她們在錶行細心挑選，睇中心頭好後即着店員拿錶試戴，Macy先後戴上多款價值約萬元的名錶，並對着鏡仔細研究，嘉琪則在旁畀意見，但最終卻沒有購買。

她們其後轉戰傢俬舖，看來Macy對Eric的家居擺設相當熟悉，只見兩人不停試坐各款梳化，希望揀選最適合老人家的款式。

約食飯慶祝

期間嘉琪突然前往試按摩椅，試坐時一臉享受，Macy則沒有試坐，只在旁邊聽售貨員講解。不過，兩人行足大半小時依然沒有斬獲。

事後Macy接受電話訪問時表示已見過孫媽媽，感情不俗，雖然未揀好禮物，但母親節期間會相約食飯慶祝：「可能同Auntie飲茶啦！雖然Eric去咗台灣，但唔使等佢，我哋平時都有見面。（送咩禮物？）仲未決定，其實最緊要心意！」Macy亦很孝順母親，計劃與弟弟請媽咪食海鮮餐：「同埋我打算買玉鈪氹媽咪，佢鍾意玉器。」