黃貫中遭「掌摑」追究到底

黃貫中（Paul）與樂隊日前在北京的音樂節演出，阿Paul因爭取綵排而與製作人起爭拗，完騷後樂隊竟遭幾十個大漢「圍攻」，阿Paul怒吼猶如被打一巴，一定追究到底！

阿Paul在剛過去的周日晚參加北京舉行的《中國樂谷·北京國際流行音樂季》，並以壓軸歌手身份演出，首場更有加拿大小天后Avril Lavigne演唱。阿Paul雖然演唱過程順利，卻遭當地製作人員所為辣慶！他即晚在微博留言炮轟：「我們不肯，他們就變回流氓，結果演出結束後就圍上我們要打要殺，還推我歌迷……至於那位X，貫中在這跟你講：你打我一巴掌就是打了我們所有人……」

矇矓間被兜路

阿Paul昨日已由北京返港，接受電話訪問時依然很火：「放心，我冇畀人打！」他表示當日由吉隆坡飛到北京，已30小時沒有睡覺，但他想開騷前先作綵排，但有製作人故意拖延，當時他坐在車上休息，矇矓中聽到有人吩咐司機兜路：「有關方面安排失誤，簡直亂糟糟！又話運送器材嘅車唔知去咗邊，用呢啲藉口唔畀我綵排！我同佢哋講冇得排我情願唔玩返香港，佢哋又唔畀我攞番器材走，我要求10分鐘綵排啫！最後觀眾入咗場，我堅持喺幕後面照排，試吓樂器有冇問題都要o架！」

阿Paul形容當晚演出相當順利，觀眾反應很好，想不到完騷後樂隊與他分別離開，但樂隊人員乘坐的車輛竟被幾十個彪形大漢圍堵，並兇神惡煞拍打車門，聲稱他們毀壞樂器不給離開，最令他震怒是那些大漢還推撞歌迷：「如果我知一定唔會走，我喺度一定搞到去醫院！佢哋就係趁我唔喺度先咁做，佢搞我兄弟、搞我啲歌迷，仲大鑊過搞我！雖然圍咗一陣就走咗，但我會同大老闆傾番件事，唔會就咁不了了之，一定追究到底！」

「係二打六問題」

對於微博留言指被打一巴？阿Paul說：「我覺得同打我一巴冇分別！個鼓係正常耗損，佢哋唔好用啲咁爛藉口！又用兜路，簡直細路仔所為，好低能！」他揚言要是被打一定會「還拖」，入院都在所不計！他強調事件不關主辦單位及工作人員事：「係一、兩個二打六人員有問題啫！」至截稿前，本報記者仍未聯絡上製作單位。