舊愛洪欣送祝福

曾因拍內地劇《仙女湖之墨仙》與莫少聰傳緋聞的內地女星徐佳婧,看過莫少聰談吸毒的認錯短片後,昨日在微博上發表留言說:「看完鼻子酸到不行,句句誠懇,忍不住要說幾句。認識他合作過的都知道聰哥是信佛之人,生活健康簡單,除了拍戲工作之外就是通山跑。涉毒新聞前幾個小時他微博都是為玉樹祈禱,不止是說更是身體力行,幾年自掏腰包拍公益片,聰哥加油!」

另外,好友熊欣欣、張國強和和張耀揚均力撐莫少聰。

熊欣欣說:「尋日同莫少聰通過電話,佢都好輕鬆,身為佢兄弟,我都放下心頭大石,今日我一直開會,未睇過佢訪問,我覺得佢交代成件事唔夠,應同公眾講一聲對唔住,因為做咗唔好嘅榜樣。(幾時見面?)未,大家忙拍攝、開會,不過八月開嘅《光輝歲月》,一定唔會削減佢戲份。」

張國強說:「我一直都有留意事件,但有心冇力,今日知佢公開講嘢,好開心,即係佢可以面對事件,希望佢快啲出番嚟,可以再一齊跑馬拉松,佢係一個好Fit嘅人,希望可以快啲投身工作。」

張耀揚說:「我同佢好好朋友,事件發生後我一直打畀佢,但佢冇開電話,兩年前我跌親,腰椎盆骨移位,要臥床兩年,當時都係佢收留我、服侍我,佢向來唔會對朋友Say No,所以惹來呢單禍,希望佢可快啲重新面對。」

至於舊愛洪欣則說:「見到佢出咗嚟幾好吖!(打畀佢?)唔會,大家冇聯絡好耐,同埋好老實講,我都冇佢電話。我哋已經係兩個個體,大家有各自嘅生活,唔會因為呢件事而特別同佢聯絡,不過都祝福佢冇事。」