呂晶晶被捧一姐任開價
亞視重整藝員部，據知新老闆已下旨首先簽呂晶晶，力捧她為「亞視一姐」，薪酬任她開，更派人與晶晶經理人公司「講數」！晶晶雖然不是亞視包薪合約藝員，但06年簽經理人公司後，依然不斷接亞視工作。有指新老闆已向公司高層下旨，以「銀彈」攻勢利誘晶晶，誓要將她簽為旗下首個「親生女」，讓她成為明年多部劇集的女主角！
晶晶昨日回覆記者時承認此事，更指老闆前晚於金像獎頒獎禮上親口叫她快些回巢：「佢好睇得起我，亞視亦畀咗好多機會我！（點決定？）依家有合約上問題，唔係話傾就傾，人工、金錢同機會方面都要考慮！被捧為一姐都要實際有乜嘢Job。（同執行董事盛品儒傳緋聞怕被指點？）唔關佢事！炒作新聞我唔計較，自己畀心機做嘢一定有人睇到。」
呂晶晶坦承亞視斟她簽約成為「親生女」。