家輝倒灶照Happy超儀輸獎贏親情

前晚《第30屆香港電影金像獎》圓滿結束，何超儀、張家輝及楊千嬅等落選者亦出席慶功宴支持，有三位家姐及老公撐場的超儀，坦言未為失落影后而不快，更大讚劉嘉玲實至名歸：「冇人做武則天可以做到佢咁有霸氣、天然同自然囉！但頭先未有時間親身恭喜佢！」她透露正籌備新作，戲種不會圍繞色情、暴力及血腥，而是另一種瘋狂，更有信心明年金像獎再下一城獲提名，對於三位家姐睇足全場，她說：「平時姊妹間好少交流心事，但今次提名，佢哋主動攞飛，仲坐足成晚，好感動同感激！」

而大熱倒灶的家輝在英皇慶功上，坦言恨攞獎，但霆鋒能代表《綫人》奪得唯一的個人獎項，亦令他感開心，問到會否與對方食飯慶祝？他說：「大家性格咁孤僻，又各有各忙，唔需要成日見，相信總有機會碰面。」瘦了一個碼的他惹來患病疑雲，家輝笑言是為新戲作準備，稍後還要再減磅。

失落影后的千嬅，昨日錄影無綫節目時表示滿意賽果，還踢爆老公丁子高很緊張，宣布影后一刻時雙手又濕又凍：「佢後嚟扮人肉金像獎獎座，但我叫佢收番個肚先，我唔會特別失望，因為又唔係拍咗好多攞獎題材嘅戲，一陣攞咗畀人鬧仲衰！」她昨日凌晨在微博留言，指老公陪伴左右已令她快樂，結果如何不是重點。此外，失落影后的湯唯打扮復古，熱情地向兩旁揮手時，不慎撞中雨棚的鐵柱，事後尷尬得舉起拇指，以笑遮醜！