嘉玲靠命長掃獎追擊偉仔

第六度提名金像影后的劉嘉玲前晚終守得雲開，首次捧獎而歸！風騷無限的嘉玲大方分享老公梁朝偉的肉麻短訊，揚言只要夠長命，會追趕偉仔的獎項！

出爐影后劉嘉玲前晚返回後台，即收到偉仔的驚喜花束，難怪一臉冧樣！早前揚言捧獎後會公開偉仔溫馨短訊的她，大方分享肉麻內容：「佢同我講，無論結果如何，我都係佢心目中最佳女主角！（好冧？）係啊！多謝朋友陪我一齊成長。（佢冇嚟美中不足？）冇緊要，係有啲可惜，不過世界上冇任何嘢係完美，有啲遺憾先係人生。」雖未能與周潤發同台攞獎，但嘉玲大讚謝霆鋒：「霆鋒都好，未來電影靠佢呢啲年輕人喇！」

飄飄然見暈

完騷後，嘉玲與大夥兒趕到電影公司在尖沙咀舉行的慶功宴暢飲，她在場內表示偉仔有致電給她：「佢有睇直播，仲緊張過我，佢同小寶（爾冬陞）都有講電話，小寶專登唔放佢返嚟，話唔『老利』我，唉！用心良苦，但講笑啫！」終奪金像影后的她強調未完成任務：「要追番偉仔，佢仲有個康城影帝，十幾個獎有排追，但有志者事竟成，只要我有咁長命，都會一個一個咁追番我老公！（個獎放邊？）擺喺佢啲獎中間。（畀媽咪？）咁擺一晚送番畀媽咪囉！（媽咪喊？）我人生順境失意，佢都陪住我，相信嗰啲係開心嘅眼淚！」問到為何冇在台上哭成淚人，嘉玲感慨地說：「年紀有番咁上下，咁多年嚟都識得點去紓緩情緒，又或者可能自己反應慢，返屋企靜落嚟先感受到份喜悅。我仲好暈，好似踩住舊雲咁！」她坦言不會加片酬，自知女演員片酬去到邊，最緊要拍好戲、演好角色；又指往後拍戲不會刻意揀徐克作品：「香港有好多好導演想合作，而且我呢個年紀選角有限。」

醉High見人就攬

直至凌晨五時左右，腳步浮浮、明顯帶醉的嘉玲，由兩名友人扶着步出夜店，High爆的她見人就攬，與徐克、施南生擁抱吻別後，登上保母車直返寓所。嘉玲回家後意猶未盡，早上近八時在微博高歌：「白雲飄呀綠水搖，世界多逍遙，快樂的人唱快樂歌遙（謠），今朝多歡笑，多麼的快樂……」王菲大讚好姊妹靚爆：「恭喜啊5妹……這小曲兒哼的，怕是已經入了仙境了！」Janice Man和吳佩慈等亦在微博祝賀，嘉玲以「感恩、惜福」回應。此外，嘉玲昨晚七時半許，與母親離開寓所往銅鑼灣。春風滿面的她連番多謝記者祝賀，表示相約友人食飯，問到偉仔是否太忙未能相伴？她說：「係啊！佢真係好忙！」另一邊廂，在內地拍攝《大魔術師》的偉仔，戥嘉玲開心：「好開心，太開心了！」並在片場開香檳慶祝。