感激發哥支持 栢芝賀老公速造人

張栢芝前晚陪老公謝霆鋒出席金像獎頒獎禮，見證着老公榮登影帝一刻，栢芝激動落淚，場面感人！栢芝昨日接受有線訪問大談感受，她表示一知老公奪獎，耳仔即塞掉，完全聽不到霆鋒上台致辭時曾提過她，再加上劉嘉玲於台上甜絲絲地提到梁朝偉，令她回家後，都有向老公「投訴」一番，栢芝笑說：「我同佢講，有啲嬲㗎！我廿三歲攞第廿三屆影后，佢三十歲攞第三十屆影帝，真係好啱。（想唔想一齊攞影帝影后？）好想。」

霆鋒前晚於台上向父親謝賢講了一番埋藏心底十二年的說話，問栢芝有冇聽過，她搞笑地說：「佢哋兩個只會擺甫士，好少講嘢，墨鏡好似用AA超能膠黏住，行樓梯會打斜行。」

對於周潤發力撐霆鋒，栢芝十分感激，她指發哥在她心目中是最叻、最有地位的男演員，發哥讚她的老公，令她很開心及感動。

前晚栢芝於紅地氈上，曾揚言霆鋒拿影帝便會實行造人計劃，問她有否兌現承諾？她說：「努力緊。」談到霆鋒攞影帝，她會送甚麼禮物鼓勵老公？她說：「反過嚟，我同佢講過佢攞影帝要送份禮物畀我，咁啱尋晚慶功嘅地方，左右兩面都有我最喜歡嘅名店，我同佢暗示，佢同我講，我話啫！佢冇應承喎！」