霆鋒台上漏致謝呵番拉姑

出爐影帝謝霆鋒前晚領獎時，感謝父親謝賢和太太張栢芝，卻忘記多謝媽咪狄波拉（拉姑），再加上周潤發與拉姑開玩笑，即掀起「家事風波」，拉姑還醋意大發。

影壇盛事《第30屆香港電影金像獎》前晚圓滿結束，謝霆鋒憑英皇電影《綫人》首度稱帝，他在台上暢談感受時，除向父親謝賢（四哥）道歉外，又感謝栢芝支持，獨漏了感謝媽咪拉姑，加上拉姑未獲邀出席，而周潤發又拿拉姑開玩笑，指拉姑日前「藐」他，即令拉姑大呷乾醋。

查小欣昨日在電台節目《巴巴閉邊個夠我查篤撐》，讀出拉姑發給她的訊息：「可能喺呢個（據知是張學友）演唱會音量下，發哥冇聽見我同佢講多謝，但流年不利，就成為呢個罪人，依家一片父慈子孝聲中，更加不能有回應，又一次啞子食黃連，別人一句笑話，我就心如刀割，有冇人比我更支持個仔呢？」

母女一齊哭

拉姑接受本報電話訪問時，對霆鋒稱帝感高興：「好開心。（有冇喊？）由尋晚喊到依家，發哥個玩笑開得太大，我點敢藐佢呢？我要請佢食飯當掩口費！（霆鋒漏咗多謝你？）唔緊要，今次老竇，下次到我，做媽咪只想佢開心，我係『黃頁』，有嘢就配合啲後生，每次佢有困難都搵我。（寄語霆鋒？）再接再厲。」拉姑表示女兒謝婷婷亦有致電：「我哋兩母女一齊喊，佢當哥哥係偶像。」

而霆鋒昨日解釋對四哥的「道歉言論」：「自己想講好耐，覺得呢個係最適合場合，而且埋藏心底好耐。因為近期同佢傾偈多咗，知佢年紀大，唔想後悔，好在趕得切。（冇多謝拉姑？）係呀！冇多謝媽咪，希望佢唔好呷醋，唔係唔錫佢，因為爹哋年紀大過佢，如果下次有機會，會多謝番佢。」

此外，霆鋒又感激發哥，問到會否有壓力？他說：「唔敢當，做好本分。（爹哋打畀你？）收到佢電話，男人之間講嘅嘢。（佢原諒你？）總之收到啦！（加片酬？）冇諗。（更加搏？）要睇原則。（同老婆一齊攞獎？）有冇得提名已成問題。」

戥愛兒高興

昨晚七時許，身穿紅衫的霆鋒，先坐車到灣仔出席飯局，心情靚爆的他笑容滿面。當他下車時，遇到大批旅客，期間有女粉絲要求合照，霆鋒任影唔嬲。至八點半，栢芝亦到達灣仔會合老公。而出席飯局的還有何超儀夫婦、梁漢文、洪天明及周家蔚等。

另一邊廂，謝賢接受查小欣訪問時，亦戥霆鋒攞獎開心：「但未至於興奮。（佢番話『銀』咗12年？）番說話（當年）有少少過分，但冇唔開心，我當佢哋朋友，唔係仔女，大家相處融洽。（唔去撐場？）唔知點解唔鍾意去人多場合。（你係最佳男主角？）梗係，我識做戲，但係對鏡頭。」

本報記者其後致電謝賢，對於霆鋒愈來愈Chok，他笑說：「我啲種梗係得啦！（霆鋒忘記多謝發哥？）唔緊要，自己友，佢唔會怪我哋。（有冇喊？）冇，少少感動都有，睇佢攞獎都好安慰。」