孟瑤掃名牌包裝金叵羅

昔日「晶女郎」孟瑤，去年為內地富商秘密產子，收埋昔日咪神形象，專心做少奶奶。日前闊太打扮的她手抱四個月大肥B穿梭名店！

內地女星孟瑤擁有34D豐滿上圍，早年獲王晶賞識拍攝多齣電影，憑性感演出成功出位，惟去年她突然玩「失蹤」，10月爆出她為內地富二代周磊秘密誕下兒子Dustin，長居北京。日前，她抽空來港名店掃貨，收起性感以闊太Look示人，今時不同往日。

當日孟瑤「撇甩」老公，與兒子、母親及好友趙彤逛銅鑼灣，她全身名牌打扮，手戴鑽石名錶及鑽石手鐲，身穿皮褸襯連身裙，腳踏Chanel鞋出巡，一行人先走入Dior童裝店，孟瑤將兒子交由母親照顧後，專心挑選店內的奶瓶、衫及鞋等，她與好友趙彤揀衫仔時，似乎不甚在乎價格，期間還拿起一個粉紅色手袋仔，莫非已計劃追多個BB女？最後孟瑤未為囝囝揀到心頭好，即轉場到另一間名店血拚。

步出Dior後，孟瑤深怕重磅巨B令母親疲累，即接力抱仔，尚未收身成功的她臂力十足，抱着囝囝巡了多間舖亦未手軟，她行到擺滿玩具公仔的櫥窗前，更邊睇玩具邊逗BB，場面溫馨。

目標生多兩個

發現記者後，孟瑤大方抱BB任影，其子精靈可愛，與她同樣是單眼皮，十足餅印，問到為何不見夫婿周磊同行，她說：「佢返咗北京做生意，我留多幾日就走。（再生BB？）好想，我同老公都好鍾意小朋友，想生夠三個，仔女都冇所謂，總之屋企熱鬧就好。（喺北京好悶？）少少啦！不過我成日返嚟香港同朋友敍舊，好開心。」說罷，她與趙彤往ifc睇戲，囝囝則交由母親湊走，臨走時，孟瑤與囝囝錫錫才捨得離開。