傅嘉莉掃名錶睇辣跑

多年來被傳獲富豪「照顧」的女星多不勝數，近年在模界冒起的傅嘉莉，除升呢到日本發展外，一連兩日瘋狂掃名錶、手袋和睇靚車，突然富貴起來！

入行已一段日子的傅嘉莉（Kelly），曾簽約電影公司與余文樂等拍戲，其後加入Elite模特兒公司，投身模界及接拍廣告外，最近往日本發展的她，日前返港即在兩日內豪花六位數字，出手闊綽。

Kelly日前於下午三時許在銅鑼灣，先走入OMEGA買名錶，20分鐘後即拍板買了一隻名錶，心情靚絕。其後，她到附近車行試車，睇中的名車價值不菲，對最新款的Benz跑車甚感興趣，車行經紀殷勤地介紹各款靚車，她坐入車內感受一番，並與經紀傾談數十分鐘後離開。Kelly逛了個多小時仍興致勃勃，再到紅酒專門店掃紅酒，據知她訂購六支法國佳釀，但因該紅酒非常名貴兼貨源極少，故她惟有先落訂。

揚言冇人「照顧」

翌日下午，Kelly再到銅鑼灣購物，甫落車即走入Chanel買了一個最新款的手袋，估計兩日內花費至少十萬元！

事後記者致電詢問為何生活如此富貴？Kelly起初不想回應，但當問到會否擔心被指有人「照顧」？她說：「梗係冇咁嘅事啦！（兩日內豪使十萬？）我有去你講過嘅名店，但冇使咁多錢，只係幾萬蚊！我近排好忙，連母親節都冇得同媽咪過，買定隻錶送畀佢，只係三萬蚊！個Chanel手袋，我想買好耐，之前拍廣告又拍戲，儲到錢要孝敬家人，亦想對自己好啲！（睇名車？）車想換好耐，只係睇吓，邊有咁多錢供！又話加車稅，我真係冇咁嘅能力負擔！」