陳嘉桓功夫夢

女權？女拳？經過千禧第一個十年，不再由男拳主導，劉璇由平衡木跳入公仔箱擂台橫掃千軍；陳嘉桓從天橋殺入大銀幕打出血路，拳頭已非甄子丹獨享，女性也可以做宇宙最強！

年僅18歲的陳嘉桓（Rose）樣子甜美，打扮與時下初熟少女無異，大有條件引死一眾宅男，但當她換上全副武裝及揮拳踢腿時，即化身幹勁十足的「鐵娘子」！15歲便加入模界的她，原本是每天着靚衫行天橋，做女生們夢寐以求的工作，但偏偏踏上武打之路︰「模特兒形象多變，咪當打女係其中一個造型，加上打女喺娛樂圈唔多，行呢條路特別啲！趁自己仲後生，有機會咪去做吓囉！」拍打戲受傷在所難免，Rose早前因練習旋風腿意外受傷，問到會否擔心留疤，她樂觀地說︰「整親其實唔緊要，之前拗柴都唔係第一次，咪當嘗試囉，幾有新鮮感呀！其實受傷係入呢行嘅紀念品，大吉利是講句，可能之後會傷得好嚴重呢！」

不屑露模行性感

雖然Rose性格樂觀，但年紀輕輕便要承受工作壓力及冷言冷語，難免偶有不快︰「之前學詠春時有機會去拍一個短片，飾演小龍女要耍劍，嗰時唔識覺得好難，搞到成日NG，加上工作人員講啲難聽說話，真係唔開心！（有冇為工作流第一滴眼淚？）拍《葉問前傳》嗰陣要特訓，我嘅進度又比人慢，記得有一次差唔多收工，因為我打極都打唔好，其他演員仲執好晒嘢等我，加上畀人鬧，所以之後喊住打，不過我喊係因為激氣自己打得唔好！」

環顧娛樂圈，不少「卜卜脆」的模利用青春胴體成名，但Rose卻揚言賣武不賣肉︰「喺工作上或朋友都有問點解唔去行性感、着三點式？一個做設計嘅朋友曾經叫我幫佢影輯好性感嘅相，但我拒絕！依家就着三點式，之後有人叫我再着少啲咁點算？我唔希望畀觀眾唔好嘅印象！」她又慨嘆Model的定義被扭曲︰「以前要5呎9吋先可以做Model，係健康同講氣質，但呢一行依家淨係得性感、身材同數字！」

誓做緋聞絕緣體

為工作肯搏肯捱，但Rose的努力卻被與林峯的緋聞模糊焦點，令她備受網友批評，對於林峯與內地女模潘霜霜的床照流出，問到有否感到甩難？Rose說︰「唔可以咁講，只係大家好多猜測，可能係宣傳效應啩！咁啱拍咗個MV！」話雖如此，但她最近再次捲入「三角謎情」中，面對種種負面新聞，她選擇一笑置之︰「我唔覺呢一行難撈，每日都有新事物同新挑戰，就好似呢啲謠言咁，我會從挑戰中學習，經一事長一智！」她揚言日後與其他男星合作亦不會避忌，誓做緋聞絕緣體︰「暫時冇時間拍拖，感情隨緣啦！咪試吓喺戲入面拍拖囉！（唔怕變中女先拍拖？）中女唔一定差，好多成功嘅女星都遲婚，我亦唔介意遲婚同遲生小朋友！」

後記：「港女十式」˙頂唔順

剪了齊蔭的Rose笑言，要做回一個18歲女生誘宅男，並強調懂得擺「港女十式」︰「都識嘅！平時都見到女仔嘅自拍照，不過自己好少咁影相。」說罷即拿起手機擺出多個甫士自拍，但看畢照片後即大嗌「頂唔順」︰「嘩！好唔襯我，驚嚇親人！」女人果然與春天一樣，一日三時變！