娜姐JM潮鬥型黑

速食社會講求新鮮感，女星當然亦要形象百變，時裝判官張學潤（Nelson）再為大家品評女星造型，更大讚周秀娜及Janice Man（JM）的全黑Look夠型！

周秀娜簡單有型

評語:「周秀娜套衫簡單有型，而且好配合身形，美中不足係髮型搞到聚埋一邊，放番落嚟就Perfect！」

索爆指數：★★★★

謝安琪啱Feel夠潮

評語:「件衫本身好有特色，謝安琪亦Carry得唔錯，顯得佢瘦咗，令人望得舒服而且有時代感。」

索爆指數：★★★★

江若琳略欠Sharp醒

評語:「套衫唔差，但着喺江若琳身上就一般，個人覺得佢啱着啲Colourful啲嘅衫，睇落會精神啲！」

索爆指數：★★★

周麗淇過熟空姐

評語:「顏色OK，但款式令佢變得太過成熟，唔襯佢之餘仲好似空姐制服，如果唔襯呢條半截裙就順眼得多。」

索爆指數：★★★

何超盈頭飾累贅

評語:「都算合格，配襯上亦冇太大問題，唯一問題出咗喺個頭箍度，感覺有啲多餘！」

索爆指數：★★★

Janice Man不落俗套

評語:「條裙好啱JM身形，亦能夠帶出佢嘅美態曲線，而且感覺得體，一啲都唔覺得俗氣。」

索爆指數：★★★★

官恩娜清新少女

評語:「好少見官恩娜着呢類運動Style，不過睇落好Fresh，仲多咗一份少女味，畀人一種同平時好唔同嘅感覺！」

索爆指數：★★★★

吳雨霏毫無特色

評語:「吳雨霏呢個形象唔係差，不過唔係好襯佢，搞到佢身形上嘅特色全部唔見晒，冇咗星味之餘仲有啲似女版稻草人！」

索爆指數：★★★

時裝判官Nelson

著名時裝設計師兼形象指導張學潤（Nelson），在娛樂圈打滾近廿年，審美眼光獨到，評衫作風大膽敢言，在行內有「時裝判官」之稱。

（5★為滿分）