DaDa被高炒 生剝阿驄報復

林敏驄向來玩到癲，日前有指他拍下女拍檔的走光相放上網，但昨日錄影節目時他仍冇避忌，與模嘉賓盧頌之（DaDa）及Annie G.玩到瞓地兼解鈕，心情未受影響。

林敏驄主持亞視節目《智醒智勁四方城》艷福不淺，多次與嘉賓如周秀娜等玩得勁親密，日前有指他拍下節目拍檔譚杏藍（小花）的走光相放上網，令對方感到委屈。

昨日兩人同場錄影明顯冇偈傾，阿驄貫徹喪玩作風，與嘉賓DaDa及Annie G.互相高炒影相玩「事件重演」，一時被兩女摸胸，一時瞓地被「生剝」除衫鈕。期間小花因要拍劇《親密損友》而中場離開，阿驄即笑說：「有個主持消失咗，全場為佢默哀，我惟有搵個阿婆頂。」

拒額外為亞視教女

對於被指因事件將被叮出局，阿驄接受電話訪問時否認：「仲有三集先完！（梁思浩頂上？）唔係！我都同老闆王征傾過，佢話唔係。（主持下一輯？）再傾啦！我大把嘢做。」他表示心情未受影響，又笑說：「玩到好開心，仲畀DaDa非禮，我要報警呀！」但他似乎不滿小花中途離開，問到會否安撫對方？他即說：「吓？呢啲嘢亞視做，我冇義務幫亞視教女。（同佢面左左？）冇！我做好主持，唔會做額外嘢。」

小花自稱尊重前輩

至於小花表示與阿驄同場冇尷尬，但坦承為報道不悅。提到阿驄為人，她說：「我好尊重呢位前輩，人與人之間要互相尊重！」此外，最近有人在微博指小花搶人男友，令她大受困擾：「係誤會！呢個人之前已經騷擾過其他人，好過分！」