鄭中基被圍：畀條路我行！
鄭中基（Ronald）被指與有線主播女友余思敏奉子成婚後，二人一直未有露面。昨日Ronald現身機場前往寧波拍戲，他在助手陪同下匆匆入閘，被大批記者包圍，造成混亂，但他全程心情勁靚，笑到四萬咁口，當記者要求他停步接受訪問時，他說：「我好趕時間，要入去（入閘登機），一係行埋一邊影相啦！畀條路我行！」問到將為人父心情是否特別好？他說：「我去到嗰邊仲要開夜班喎！（搵奶粉錢？）不嬲都要搵錢！」
當記者追問是否打算十月擺酒迎娶余思敏？Ronald反應極大反問：「吓？擺酒？擺咩酒呀？（係咪結婚？）多謝關心！（好開心呀？）我日日都咁開心！」另外，身為余思敏舊同事的黃翠如大爆對方一向愛情至上，她說：「佢將愛情放好重嘅位置，一有愛情就全情投入。」
至於同樣現身機場的劉嘉玲，透露準備前往台灣工作，對於大批記者在場都不以為然。
被指榮升老竇的鄭中基，被大批傳媒追訪依然風騷！
劉嘉玲戴着黑超赴台灣工作。