栢芝炮製霆鋒影帝戰衣

謝霆鋒今年首度提名《金像獎》影帝，但向來衣着隨便的他對戰衣毫不在乎，不過太太張栢芝則勁緊張，昨日放下家務陪老公外出置裝，她笑說：「有我做形象指導，係咪OK好多先！」

今屆香港電影金像獎將於本月17日舉行，去年最佳男配角得主霆鋒今年憑英皇電影《綫人》首度提名影帝，鬥張家輝、周潤發、梁家輝及張學友！昨日栢芝陪實霆鋒置裝，不讓老公Hea住「登基」！

昨午約五時，鋒芝到金鐘搜購戰衣，霆鋒一臉從容，反而栢芝緊張地為老公打點，霆鋒透露上衣已有心水，此行主要揀褲。除了試褲一段短時間外，兩人Keep住十指緊扣，恩愛到爆！眼見老公穿拖鞋逛名店，栢芝說：「你睇佢着到咁都知啦！有我做形象指導，係咪OK好多先！」她表示為置裝暫放下家事：「之前家姐幫手睇囝囝，但佢要去加拿大陪個女開學，得番工人睇屋，原本唔放心，但都要出嚟！呢日未必睇啱，會再去中環睇。」

爭取留港陪出戰

已是金像影后的栢芝，對於老公能否得獎甚為上心，不時問記者意見：「你覺得佢贏嘅機會有幾多？如果你話贏，我就一定去。」原來栢芝在頒獎禮當日有工作在身，但正盡力要求留港。反而霆鋒以平常心面對賽果，他說：「冇所謂啦！反而公司緊張啲！」

此外，霆鋒早前公開其後期製作公司CEO身份，年賺逾億，但有報道指他與栢芝投資物業及公司擴張業務意見出現分歧。對此，霆鋒說：「黐咗線！」栢芝則說：「點解會搞成咁？」據知兩人財政獨立。提到細仔Quintus超重，栢芝說：「好得意喎！佢似我多啲。（生五個？）仲有兩套戲要返內地拍，今年底或者出年初先啦！」