楊梓瑤餵仔嗒糖考腦筋

進軍影壇的楊梓瑤（Carol）最近忙於拍戲，每次等埋位時除了背對白外，最愛就是玩iPhone自娛，今次向讀者推介的是連蔡卓妍都玩上癮的小遊戲「Cut the Rope」！Carol邊興奮邊介紹說：「個Game係要諗辦法畀怪獸仔食到粒糖，而每一關最高分係食晒三粒糖。我最鍾意佢係要考吓腦筋，但又唔係太難玩，隻怪獸仔個樣仲好可愛！」她表示該遊戲可以免費下載，有興趣的話可以先試玩一下，再付錢下載全套。

相反，另一位靚女呂慧儀平日很少玩Apps，但為了氹小朋友開心，特別下載「Talking Tom」，打開溝通橋樑，她說：「我班姪仔、姪女得幾歲大，每次見到我都好鍾意攞部iPhone嚟玩，見到識講嘢嘅貓貓就好開心，對住部電話唱，隻貓又跟住，場面好搞笑！」其實「Talking Tom」還有不少朋友，包括長頸鹿、雀仔、機械人及聖誕老人，大部分遊戲都是免費下載！

楊梓瑤推介

「Cut the Rope」價錢：US$0.99

玩Apps全攻略：「遊戲有無限復活，當你唔小心跌咗粒糖時，佢就會畀你重新嚟過，當你知道邊個位衰過，就要記得下次小心啲。第一次衰咗，玩多幾次就一定過到關，而且個Game仲可以隨意『跳級』添！」

呂慧儀推介

「Talking Tom」 價錢：免費

玩Apps全攻略：「Talking Tom識得同人講說話，用手指掃吓佢身體唔同部位，就會作出唔同反應，識笑之餘又會識嬲，仲會發惡抓人，總之就表情多多！另一個功能係可以錄製短片，創意任你自由發揮！」