詩雅揀理想男友唔熟唔食

女星詩雅甫出道已被稱為「翻版大S」，對於「正版大S」嫁得好歸宿，仍屬單身的詩雅坦言非常羨慕，還公開擇偶條件，另一半必須要成熟穩重又帶點不羈，反而靚仔免問！

影壇新貴詩雅出道已三年，因其烏黑秀髮及清純外形，與台灣女星徐熙媛（大S）酷似，故被稱為「翻版大S」。對於大S早前結婚，展開人生新一頁，詩雅十分羨慕，相反自己年屆26歲，但感情仍未有着落，她說：「由細到大有一項條件冇變過，就係將來另一半一定要好成熟，無論思想、年紀同性格都係，要教到我嘢同照顧我！因為我有時都幾情緒化，所以接受唔到姊弟戀。（你係筍盤？）大把女仔筍過我啦！」 詩雅與同公司的陳家樂分屬老友，經常互訴心事但從未過電，她笑言不愛靚仔皆因好煩：「我唔鍾意靚仔，反而喜歡滄桑味重，着衫求其嘅不羈男人。我最怕男仔姿整，有啲男仔去洗手間仲耐過女仔！仲有最驚男仔遲到，約女仔仲要遲到，真係好冇誠意。」

一見鍾情隨時閃婚

雖然渴望愛情，但詩雅相信緣分，亦絕非「愛情至上」的女孩，不希望影響工作，她說：「談戀愛要講感覺，係就係！身邊有朋友拍咗好耐拖，到頭來分手收場。（一見鍾情？）都會。（學大S閃婚？）會呀！感覺嘅嘢好難講嘛！」

除了被稱為「翻版大S」外，詩雅早前出席活動時被錯認是內地女星范冰冰，難得她毫不介懷：「認錯其他靚女都冇所謂！（自覺似大S？）本身唔覺似，但有時睇番雜誌或報紙啲照片，某啲角度又確係似。（好事？）冇乜嘢，反而着數咗！」

詩雅入行至今以拍電影為主，於話題作《囡囡》與《前度》更作大膽演出，在《前》片裸露玉背搏到盡，但已是個人底線，她說：「我最盡係露背。（露臀？）接受唔到！（着內衣通屋走？）要考慮角色有冇需要。」她憶述拍《前》片時情緒受到困擾，壓力甚大，幸好公司讓她放假充電，最終亦可抽離角色。

恨挑戰精神病角色

不過，縱然有個人底線，但詩雅認為不應因此而局限角色，現時最恨挑戰精神病患者的角色：「早排睇完《黑天鵝》，個角色好難演，但又係一個好好發揮嘅角色。我覺得演員唔應該介意演乜嘢角色，演戲最緊要自然真實，影迷睇得開心就最好。」

談及心目中最想合作的前輩，詩雅表示喜歡影后級的惠英紅、張曼玉及張栢芝：「佢哋演戲好自然，舉手投足都係戲。（男演員？）廖啟智！佢演技一流，可以演一個好爸爸，但同時又可以係深藏不露嘅壞人，能夠將好多角色發揮得淋漓盡致。」她亦對李治廷讚不絕口：「佢好勤力、又靚仔，而且唱歌同演戲同樣出色，希望有機會同佢合作。」不過問到會否嘗試唱歌，她即擰擰頭：「唔會啦！我唱歌超級難聽，寧願專心拍戲同拍劇。」

宅女愛玩狗

熱愛電影之詩雅對寵物美容亦極有興趣，她表示將來若不在圈中發展，會轉行從事寵物美容或鑽石批發生意：「本身對寵物美容好有興趣，依家屋企有三狗兩貓，平時照顧佢哋都花好多時間，但我樂在其中。」她還自嘲是「宅女」一名：「除咗同貓狗玩外，平時就係睇書，反而好少上網同睇電視，亦都唔太鍾意出去飲嘢，寧願留喺屋企。」

文：戶冊平　攝：司徒國榮